Rusiyaya zərbələr vurulmaqla onu atəşkəsə məcbur etmək olar - Müsahibə
Kremlin sözçüsü Dmitri Peskov Rusiya, ABŞ və Ukrayna arasında böhranın həlli ilə bağlı danışıqların oktyabr ayında yenidən başlaya biləcəyini bildirib. Bu açıqlama müharibənin diplomatik yolla həlli istiqamətində yeni mərhələ ehtimalını gündəmə gətirib. Kiyev də üçtərəfli danışıqların oktyabrda yenidən başlamasına hazırlaşdığını açıqlayıb. Bununla belə, tərəflər arasında əsas məsələlər üzrə ciddi fikir ayrılıqları qalır. Xüsusilə ərazi məsələsi danışıqların qarşısındakı əsas maneələrdən biri olaraq qalır və Moskva hələlik oktyabr görüşlərinin konkret formatını təsdiqləməyib.
Mövzu ilə bağlı politoloq Məhəmməd Əsədullazadə Crossmedia.az-a müsahibə verib:
-Rusiya, ABŞ və Ukrayna arasında danışıqların oktyabrda bərpası real görünürmü?
-Bəli, oktyabrda danışıqların başlaması mümkündür. Amma hazırda real və praqmatik həll yolu görünmür. Tərəflərin heç biri digərinə qalib gəlmək gücündə deyil.
-Moskvanın danışıqların yenidən başlaması ilə bağlı açıqlamasının arxasında hansı siyasi məqsədlər dayana bilər?
-Rusiyanın danışıqlarla bağlı mövqeyinin arxasında öz tələblərini reallaşdırmaq istəyi dayanır. Xüsusilə Putinin irəli sürdüyü tələblərin reallaşması Ukraynanın suverenliyi və təhlükəsizliyi baxımından ciddi nəticələr yarada bilər.
-ABŞ və Rusiyanın danışıqlar prosesində mövqeləri nə dərəcədə yaxınlaşıb?
-ABŞ və Rusiya arasında Ukrayna üzrə danışıqlar gedir. Lakin Rusiyanın Ukraynaya Donbasın qalan hissəsindən qoşunlarını çıxarmaq şərtini irəli sürməsi fonunda tərəflərin mövqelərinin tam yaxınlaşdığını demək çətindir.
-Ukraynanın danışıqlar masasına qayıtması üçün hansı şərtləri irəli sürməsi gözlənilir?
-Ukraynanın konkret hansı şərtləri irəli sürəcəyini demək çətindir. Amma burada yalnız Ukrayna deyil, Avropa Birliyi də prosesin iştirakçısıdır və onun qərarları da həlledici əhəmiyyət daşıyır.
-Rusiya-Ukrayna müharibəsində hazırda tərəflərin əsas üstünlüyü hansı istiqamətdədir və bu vəziyyət danışıqlara necə təsir edə bilər?
-Hazırda tərəflərdən heç birinin həlledici üstünlüyü yoxdur. Rusiya cəbhə xəttində ciddi irəliləyiş əldə edə bilməyib, eyni zamanda Ukraynanın şəhərlərinə və enerji infrastrukturuna zərbələr endirir. Ukrayna da analoji addımlar atır. Bu vəziyyət danışıqların zəruriliyini artırır.
-Müharibənin yaxın perspektivdə atəşkəslə başa çatması mümkündürmü?
-Yalnız atəşkəs mümkündür. Rusiyaya zərbələr vurulmaqla onu atəşkəsə məcbur edib real danışıqlar prosesinə qaytarmaq olar.
Nigar Xəlilli
15:30 15.09.2026
Oxunuş sayı: 51
