Meta Instagram-da yeniyetmələr üçün təhlükəsizlik tədbirlərini genişləndirir
“Meta” şirkəti süni intellekt əsaslı yaş təyinetmə texnologiyasını qlobal miqyasda genişləndirərək daha milyonlarla yeniyetməni “Instagram”ın xüsusi hesab qorunmasına daxil edəcək.
Crossmedia.az xəbər verir ki, “Anadolu” agentliyi bu barədə məlumat yayıb.
Şirkətin açıqlamasına görə, süni intellekt texnologiyası doğum tarixində yetkinlik yaşına çatmış şəxsin məlumatlarını göstərsələr belə, yeniyetmə olduqlarından şübhələnilən istifadəçiləri müəyyənləşdirməyə imkan verir. Bu şəxslər avtomatik olaraq yaşlarına uyğun təhlükəsizlik tədbirlərinə daxil ediləcəklər.
“Meta” oxşar texnologiyanın “Facebook” platformasında da genişləndirilməsi üzərində işləyir. İlin sonrakı aylarında isə sistemin “Threads” platformasında da qlobal miqyasda tətbiqi planlaşdırılır.
Açıqlamada bildirilib ki, şirkət platformalarında yeniyetmələrin və 13 yaşdan kiçik uşaqların müəyyənləşdirilməsi imkanlarını gücləndirmək məqsədilə ABŞ-nin 52 baş prokuroru ilə razılaşma əldə edib. Yeni tədbirlər də həmin razılaşma çərçivəsində götürülmüş öhdəliklərə əsaslanır.
“Meta”nın yeniyetmə hesabları üçün nəzərdə tutduğu qoruma tədbirləri istifadəçilərlə kimin əlaqə saxlaya biləcəyini, onların hansı məzmunları görə biləcəyini və platformalarda keçirə biləcəkləri vaxtı avtomatik məhdudlaşdırır.
Şirkət digər sosial media platformaları olan “TikTok” və “YouTube”a da yeniyetmələrin təhlükəsizliyini təmin etmək üçün oxşar tədbirlər görməyə çağırıb.
Qeyd edək ki, 2023-cü ilin oktyabrında Kaliforniya, Nyu-York və Kolorado da daxil olmaqla, ABŞ-nin bir sıra ştatları “Meta”ya qarşı məhkəmə iddiası qaldırmışdı. Şirkət uşaqların psixi sağlamlığına zərər vurmaqda ittiham olunurdu.
Bu ilin avqustunda baxılmağa başlanılan iş üzrə “Meta” ştatlarla razılığa gəlib və ABŞ-nin 52 baş prokuroru ilə saziş imzalayıb. Razılaşmaya əsasən, şirkət yeniyetmələrin onlayn təhlükəsizliyinin təmin edilməsi üçün tədbirlər görməyi, həmçinin bu istiqamətdə təşəbbüslərin maliyyələşdirilməsinə istifadə oluna biləcək təxminən 18 milyard dollar ödəməyi öhdəsinə götürüb.
20:28 09.11.2026
Oxunuş sayı: 35
