Azərbaycan və Türkiyə müdafiə sənayesi üzrə birgə doktorantura proqramları yaradacaq
Azərbaycan və Türkiyə müdafiə sənayesi texnologiyaları sahəsində ixtisaslı kadrların hazırlanması məqsədilə birgə doktorantura proqramlarını həyata keçirməyi planlaşdırır.
Crossmedia.az xəbər verir ki, bu barədə Türkiyə Ali Təhsil Şurasının (YÖK) sədri Erol Özvar Azərbaycan mətbuatına açıqlamasında bildirib.
Onun sözlərinə görə, iki ölkə arasında təhsil və elmi əməkdaşlıq yeni mərhələyə qədəm qoyur. Tələbə və müəllim mübadiləsindən birgə elmi araşdırmalara, gənc alimlərin hazırlanmasından Türkiyə-Azərbaycan Universitetinin fəaliyyətinə qədər geniş əməkdaşlıq modeli formalaşdırılıb.
Özvar Türkiyə Prezidenti Rəcəb Tayyib Ərdoğan və Azərbaycan Prezidenti İlham Əliyevin Şuşada verdiyi mesajın iki ölkə arasındakı qardaşlıq əlaqələrinin gücünü bir daha nümayiş etdirdiyini vurğulayıb. O bildirib ki, heç bir qüvvə iki qardaş xalqı bir-birindən ayıra bilməz.
YÖK sədrinin qeyd edib ki, iki ölkənin universitetləri arasında akademik əməkdaşlıq və elmi tədqiqatlar sahəsində əlaqələr əvvəlki dövrlərlə müqayisədə daha da yaxınlaşıb. Bu əməkdaşlığın konkret nümunəsi olan Türkiyə-Azərbaycan Universitetində üç Türkiyə universitetinin proqramları tədris olunur və azərbaycanlı gənclər həmin proqramlarda təhsil alırlar.
Özvar gələcəkdə akademik tərəfdaşlığın strateji sahələrdə daha da dərinləşdiriləcəyini bildirib. O, müdafiə sənayesi texnologiyaları üzrə ixtisaslı kadrların hazırlanması üçün əməkdaşlığın birgə doktorantura proqramları ilə genişləndiriləcəyini qeyd edib.
18:16 09.11.2026
Oxunuş sayı: 27
