Ərdoğanın Şuşa zəfəri ilə bütün suallara cavab tapıldı- Deputat detalları açıqladı
Azərbaycan-Türkiyə münasibətləri təkcə iki dövlət arasında diplomatik əlaqələrlə məhdudlaşmır, həm də ortaq tarixə, milli-mənəvi dəyərlərə və strateji müttəfiqliyə əsaslanır. Bu münasibətlərin mahiyyəti iki ölkə liderlərinin görüşlərində, verilən bəyanatlarda və regional proseslərə dair nümayiş etdirilən ortaq mövqedə bir daha özünü göstərir. Xüsusilə Zəfər Gününün 6-cı ildönümündə Türkiyə Prezidenti Rəcəb Tayyib Ərdoğanın Azərbaycana səfəri bu baxımdan mühüm siyasi və diplomatik əhəmiyyət daşıyır.
Liderlərin Şuşada keçirdiyi görüş və mətbuata verdikləri bəyanatlar isə yalnız qardaşlıq münasibətlərinin nümayişi ilə məhdudlaşmadı. Ankara və Bakının strateji müttəfiqliyinin sarsılmazlığı, heç bir qüvvənin bu birliyə xələl gətirə bilməyəcəyi, Azərbaycanın ərazi bütövlüyünə və Qarabağda aparılan bərpa-quruculuq işlərinə Türkiyənin dəstəyi, eləcə də Cənubi Qafqazda davamlı sülh və təhlükəsizliyin təmin olunması əsas mesajlar sırasında yer aldı.
Bəs Ərdoğanın Zəfər Günündə Azərbaycana səfəri beynəlxalq ictimaiyyətə hansı siyasi mesajları verdi? Bu səfər Türkiyə-Azərbaycan münasibətlərinin gələcək inkişafı və regionda formalaşan yeni geosiyasi reallıqlar baxımından nə ilə yadda qaldı?
Mövzu ilə bağlı Milli Məclisin deputatı Nigar Məmmədova Crossmedia.az-a açıqlamasında qeyd edib ki, noyabrın 8-də Türkiyə Prezidenti Rəcəb Tayyib Ərdoğanın Zəfər Gününün altıncı ildönümü münasibətilə Azərbaycana səfəri və Şuşada Prezident İlham Əliyevlə keçirdiyi görüş iki ölkə arasındakı münasibətlərin siyasi və strateji mahiyyətini bir daha gündəmə gətirdi: “Şuşadan verilən bəyanatlar Azərbaycan-Türkiyə qardaşlığının tarixi və mənəvi bağlılıqla yanaşı, həm də ortaq geosiyasi maraqlara, təhlükəsizlik və iqtisadi əməkdaşlığa əsaslandığını nümayiş etdirdi.
Prezident İlham Əliyev Türkiyə dövlət başçısının Zəfər Günündə Qarabağda olmasını xüsusi əhəmiyyət daşıyan hadisə kimi qiymətləndirərək qardaş ölkənin 44 günlük Vətən müharibəsi zamanı Azərbaycana göstərdiyi siyasi və mənəvi dəstəyi xatırlatdı. Dövlət başçımız bildirdi ki, müharibənin ilk saatlarında R.T. Ərdoğanın verdiyi bəyanat və telefon danışığı Azərbaycan xalqına əlavə ruh və güc verib.
Prezident İlham Əliyevin bəyanatında səsləndirdiyi “biz birlikdə daha da güclüyük” fikri iki dövlət arasındakı münasibətlərin xarakterini ifadə edən əsas mesajlardan biri idi. Şuşadan səslənən mesajlar göstərdi ki, Türkiyə-Azərbaycan birliyi regionda sabitlik, təhlükəsizlik və əməkdaşlıq amilidir. Bakı və Ankara münasibətləri regional və qlobal proseslərə təsir imkanlarına malik strateji tərəfdaşlıq modeli formalaşdırıb.
İki ölkə arasındakı münasibətlərin əsasını təşkil edən Şuşa Bəyannaməsi görüşün mühüm mövzularından biri idi. 2021-ci il iyunun 15-də imzalanmış bu sənəd Türkiyə-Azərbaycan münasibətlərini rəsmən müttəfiqlik səviyyəsinə yüksəldib. Prezident İlham Əliyevin qeyd etdiyi kimi, Şuşa Bəyannaməsi xalqlarımız arasında tarixən mövcud olmuş əlaqələrin daha da dərinləşməsinə xidmət edir”.
Deputat qeyd edib ki, dövlət başçıları, eyni zamanda, iki ölkənin birliyini zəiflətmək istəyənlərin məqsədlərinə nail ola bilməyəcəyini də bəyan etdilər: “Bu mesaj Azərbaycan-Türkiyə münasibətlərinin kənar təsirlərdən asılı olmayaraq inkişaf etdirilməsi və strateji müttəfiqliyin qorunmasının vacibliyini ifadə edir.
Liderlərin bəyanatlarında regional təhlükəsizlik və gələcək əməkdaşlıq məsələləri də mühüm yer tutdu. Prezident İlham Əliyev siyasi və iqtisadi əlaqələrlə yanaşı, enerji, sərmayə, nəqliyyat dəhlizləri və Zəngəzur dəhlizinin müzakirə olunduğunu bildirdi.
R.T. Ərdoğan isə Azərbaycanın 44 günlük müharibə nəticəsində öz ərazi bütövlüyünü bərpa etməsinin Cənubi Qafqazda yeni mərhələnin başlanğıcı olduğunu vurğuladı. Onun “Bu gün qarşımızda duran vəzifə döyüş meydanında qazanılan Zəfəri dayanıqlı sülh və sabitliklə taclandırmaqdır” fikri regionda sülh və sabitliyin təmin olunmasına verilən dəstəyi ifadə edir.
Qarabağda aparılan bərpa işləri də səfərin mühüm istiqamətlərindən biri oldu. Ərdoğan Cəbrayılda Azərbaycan-Türkiyə Beynəlxalq Meşə Təlim Mərkəzinin və “Ağıllı Tingçilik” müəssisəsinin yaradılmasını, Ağdamda 40 sinif otağından ibarət məktəbin tikintisinə başlanmasını iki ölkə əməkdaşlığının konkret nəticələri kimi təqdim etdi. Türkiyə Prezidenti Qarabağın yenidən qurulması prosesində Ankaranın təcrübə və dəstəyinin davam edəcəyini bildirdi.
Ümumiyyətlə, Ərdoğanın Zəfər Günündə Şuşaya səfəri və səslənən bəyanatlar göstərdi ki, strateji müttəfiqlik, regional təhlükəsizlik və Türk dünyasında inteqrasiya ikitərəfli münasibətlərin əsas istiqamətləridir”.
Ayhan
16:34 09.11.2026
Oxunuş sayı: 30
