Ərdoğanı Bakıya gətirən mühüm səbəb: Bütün suallara cavab tapılacaq
Türkiyə Prezidenti Rəcəb Tayyib Ərdoğanın noyabrın 8-də Zəfər Günü münasibətilə Azərbaycana səfəri gözlənilir. Bu səfər iki qardaş ölkə arasında münasibətlərin hazırkı vəziyyəti fonunda xüsusi siyasi əhəmiyyət daşıyır. Son dövrlər sosial şəbəkələrdə və ictimai müzakirələrdə Azərbaycan-Türkiyə münasibətlərində müəyyən soyuqluq yarandığına dair fikirlər səsləndirilir. Belə bir şəraitdə prezidentlərin görüşü mövcud suallara aydınlıq gətirmək və iki ölkə arasındakı strateji müttəfiqliyin sarsılmazlığını nümayiş etdirmək baxımından mühüm fürsət ola bilər.
Digər tərəfdən, görüş zamanı regional təhlükəsizlik, Azərbaycan-Ermənistan münasibətləri, Türkiyənin Cənubi Qafqazdakı rolu və iki ölkə arasında strateji əməkdaşlığın daha da genişləndirilməsi məsələlərinin müzakirəsi də gözləniləndir.
Bəs, Ərdoğanın Bakı səfəri iki ölkə arasında son dövrlər yaranan fikir ayrılıqları ilə bağlı müzakirələrə son qoya bilərmi? Bu görüş Azərbaycan-Türkiyə münasibətlərinə xələl gətirmək istəyən qüvvələrə hansı mesajı verəcək?
Mövzu ilə bağlı Crossmedia.az-a açıqlama verən Böyük Azərbaycan Partiyasının sədri, Milli Məclisin deputatı Elşad Musayev qeyd edib ki, Ərdoğanın Bakıya səfəri ilə bağlı hələlik Azərbaycan tərəfindən rəsmi məlumat verilməyib: “Mövcud məlumat ondan ibarətdir ki, Türkiyə Prezidenti Rəcəb Tayyib Ərdoğan noyabrın 5-də Cənubi Koreyadan qayıdarkən jurnalistlərə açıqlamasında noyabrın 8-nin Azərbaycanın Zəfər Günü olduğunu xatırladıb və fövqəladə bir vəziyyət yaranmasa, həmin gün Azərbaycana səfər etməyi düşündüyünü bildirib”.
Deputat qeyd edib ki, əgər səfər baş tutarsa, bunun, şübhəsiz ki, mühüm siyasi əhəmiyyəti olacaq: “İlk növbədə, Azərbaycan-Türkiyə münasibətləri baxımından əhəmiyyətli mesajlar verilə bilər. Son dövrlər iki ölkə arasında münasibətlərlə bağlı müəyyən suallar və müzakirələr yaranıb. Prezidentlərin görüşü bu məsələlərə aydınlıq gətirilməsi baxımından da əhəmiyyətli ola bilər. Eyni zamanda, regional məsələlərin də müzakirə olunması mümkündür. Azərbaycan-Ermənistan münasibətləri, Türkiyənin regiondakı mövqeyi və strateji əməkdaşlığın daha da dərinləşdirilməsi kimi məsələlər görüşün gündəliyində yer ala bilər. Lakin bunlar hələlik ehtimallardır. Çünki Ərdoğanın Bakıya səfərinin baş tutub-tutmayacağı ilə bağlı əlimizdə dəqiq məlumat yoxdur”.
Ayhan
19:12 06.11.2026
Oxunuş sayı: 60
