Ukraynanın əməliyyat imkanları ciddi məhdudiyyətlərlə üzləşir - Rəy
Ukrayna cəbhəsində son dövrlər hərbçilərin üzləşdiyi ciddi problemlər, xüsusilə su çatışmazlığı, təchizat və logistika çətinlikləri, eləcə də mövqelərdə uzun müddət rotasiyasız qalmaq halları müzakirə mövzusuna çevrilib. Bu amillər hərbçilərin fiziki və psixoloji vəziyyətinə, döyüş qabiliyyətinə və ordunun əməliyyat imkanlarına birbaşa təsir göstərir. Ukrayna hərbi ombudsmanının 2026-cı il noyabrın 7-də açıqladığı araşdırmada da mövqelərdə uzun müddət qalmağın ciddi tükənməyə səbəb olduğu, xüsusilə su çatışmazlığı və logistika problemlərinin hərbçilərə ağır təsir göstərdiyi qeyd olunub.
Bəs cəbhə xəttində yaranan bu problemlər Ukrayna ordusunun indiyədək əldə etdiyi əməliyyat üstünlüklərini itirməsinə səbəb ola bilərmi? Logistika və canlı qüvvə çatışmazlığı ordunun müdafiə və hücum imkanlarını hansı səviyyədə məhdudlaşdırır? Mövcud vəziyyət Ukraynanın müharibədə məğlubiyyətə doğru getdiyini deməyə əsas verirmi?
Mövzu ilə bağlı Crossmedia.az-a açıqlama verən hərbi ekspert Ədalət Verdiyev qeyd edib ki, əslində, Ukraynanın hazırkı əməliyyatlar zonasında ciddi üstünlüyü yoxdur: “Rusiya Ukrayna ərazilərinin hazırda 18-19 faizini işğal altında saxlayır. Mövcud əməliyyat şəraitində nə Ukrayna, nə də Rusiya ərazi baxımından əhəmiyyətli irəliləyiş əldə edə bilir. Bununla yanaşı, tərəflər arasında qarşılıqlı raket və dron zərbələri davam edir. Lakin Ukrayna ordusunun malik olduğu üstünlüklər əməliyyat şəraitinə ciddi təsir göstərəcək səviyyədə deyil. Belə məhdudiyyətlər şəraitində yaxın perspektivdə Ukraynanın və ya Rusiyanın əməliyyatlar teatrında ciddi nailiyyət əldə edəcəyi gözlənilmir”.
Ekspert bildirib ki, Ukrayna ordusunun təchizatında da ciddi problemlər mövcuddur: “Xüsusilə hava hücumundan müdafiə sistemləri üçün raketlərin istehsalı Ukraynada mümkün deyil. Avropa ölkələri də malik olduqları raket ehtiyatlarının yalnız məhdud hissəsini Ukraynaya göndərirlər. Çünki Avropanın özü də Rusiya tərəfindən yarana biləcək təhlükələri nəzərə alaraq hərbi ehtiyatlarını qorumağa çalışır. ABŞ isə hətta maliyyəsi əvvəlcədən ödənilmiş raketlərin Ukraynaya göndərilməsi məsələsində belə ləng addımlar atır. Son dövrlərdə, ümumiyyətlə, Ukraynaya “Patriot” hava hücumundan müdafiə sistemləri üçün raketlərin tədarükündə ciddi gecikmələr müşahidə olunur. Ukrayna tərəfi bu vəziyyətdən narazılığını bildirsə də, ABŞ hələlik problemin həlli istiqamətində praktiki addımlar atmır”.
Ayhan
15:00 09.11.2026
Oxunuş sayı: 42
