Şoyqu: Cənubi Qafqazda vəziyyət yaxşılaşmağa doğru gedir
Rusiyanın Təhlükəsizlik Şurasının katibi Sergey Şoyqu Cənubi Qafqazda vəziyyətin yaxşılaşmağa meyilli olduğunu və regionda faktiki olaraq sülhün bərqərar olduğunu bildirib.
Crossmedia.az xəbər verir ki, “Sputnik Ermənistan” bu barədə məlumat yayıb.
Şoyqu bu fikirləri Moskvada MDB ölkələrinin Təhlükəsizlik Şurası katiblərinin görüşündə səsləndirib. Onun sözlərinə görə, bu prosesə Ermənistanla Azərbaycan arasında münasibətlərin normallaşması mühüm töhfə verib.
O, həmçinin nəqliyyat kommunikasiyalarının açılmasının böyük əhəmiyyət daşıdığını qeyd edib. Şoyqu bildirib ki, bu istiqamətdə razılaşmalar Rusiya, Ermənistan və Azərbaycanın iştirakı ilə yaradılmış işçi qrup çərçivəsində əldə olunub.
Təhlükəsizlik Şurasının katibi bütün logistika layihələrinin iqtisadi cəhətdən əsaslandırılmalı və özünü doğrultmalı olduğunu vurğulayıb.
Şoyqu Gürcüstanla bağlı da fikirlərini bölüşüb. O iddia edib ki, Gürcüstan hakimiyyəti 2024-cü ildə Qərbyönlü müxalifətin təşəbbüsü ilə hazırlanan dövlət çevrilişinin qarşısını faktiki olaraq alıb və ölkənin milli maraqlarının qorunmasına yönəlmiş siyasət yürütməyə başlayıb.
14:30 09.11.2026
Oxunuş sayı: 38
