HƏMAS Qəzzada 5 nəfərin ölümünə görə İsraili ittiham edib
Qəzza zolağının mərkəzində yerləşən Deyr əl-Bələh şəhərində yağışlardan sonra məcburi köçkün fələstinlilərin çadırlarının üzərinə qum və daş kütləsinin çökməsi nəticəsində 5 nəfər həlak olub. HƏMAS hadisəyə görə bütün məsuliyyətin İsrailin üzərinə düşdüyünü bəyan edib.
Crossmedia.az xəbər verir ki, HƏMAS bu barədə yazılı açıqlama yayıb.
Açıqlamada qadın və uşaqların da olduğu 5 fələstinlinin ölümünün İsrailin Qəzza zolağına qarşı yürütdüyü siyasətin birbaşa nəticəsi olduğu bildirilib.
HƏMAS qeyd edib ki, İsrailin davam edən blokadası, humanitar yardımın, çadırların və yaşayış şəraitinin qurulması üçün zəruri materialların çatdırılmasına maneələr yaratması, eləcə də dağıdılmış evlərin bərpası üçün lazım olan materialların bölgəyə gətirilməsinə qoyulan məhdudiyyətlər bu cür faciələrə səbəb olur.
12:10 09.11.2026
Oxunuş sayı: 45
