Böyük Qayıdış prosesi əlavə stimul qazanacaq- Detallar bəlli oldu
Azərbaycanın işğaldan azad edilmiş ərazilərində həyata keçirilən Böyük Qayıdış proqramı yalnız insanların doğma yurdlarına köçürülməsi və yaşayış məntəqələrinin yenidən qurulması ilə məhdudlaşmır. Bu prosesin uzunmüddətli və davamlı olması üçün həmin ərazilərdə iqtisadi fəallığın artırılması, yeni iş yerlərinin yaradılması, sahibkarlığın inkişafı və nəqliyyat-kommunikasiya imkanlarının genişləndirilməsi də mühüm əhəmiyyət daşıyır. Bu baxımdan Orta Dəhlizin genişlənməsi, xüsusilə Zəngəzur istiqamətində nəqliyyat əlaqələrinin qurulması Qarabağ və Şərqi Zəngəzurun iqtisadi potensialının reallaşdırılmasına, Naxçıvanla birbaşa əlaqənin təmin edilməsinə və regionda yeni iqtisadi canlanmanın yaranmasına töhfə verə bilər.
Bəs Orta Dəhliz Böyük Qayıdış proqramının ikinci mərhələsinə hansı töhfələri verə bilər?
Mövzu ilə bağlı Crossmedia.az-a açıqlama verən iqtisadçı Xalid Kərimli açıqlamasında qeyd edib ki, bunun böyük faydası ola bilər: “Yolların açılması, Ermənistanla kommunikasiya əlaqələrinin qurulması, eyni zamanda Naxçıvanla birbaşa əlaqənin təmin edilməsi mühüm əhəmiyyət daşıyır. Türkiyə ilə ticarət yolunun bu istiqamətdən keçməsi həmin marşrutun ətrafında iqtisadi canlanma yaradacaq. Yolboyu anbarlara, mehmanxanalara, gecələmə məkanlarına ehtiyac yaranacaq, ticarət və sahibkarlıq inkişaf edəcək. Əslində, "Böyük Qayıdış" dedikdə yalnız həmin ərazilərdə dağıdılmış tikililərin bərpası nəzərdə tutulmur. Böyük Qayıdış insanların öz doğma torpaqlarına qayıtması, həmin əraziləri mənimsəməsi, orada məskunlaşması və davamlı həyatın formalaşması deməkdir. Orta Dəhlizin açılması da bu baxımdan mühüm vasitəyə çevrilə bilər”.
İqtisadçı qeyd edib ki, hazırda dövlət köçürülmə prosesini əsasən mərkəzləşdirilmiş qaydada həyata keçirir: “Lakin kommunikasiya xətləri açıldıqdan sonra insanlar özləri də həmin ərazilərdə biznes qurmağa, yolboyu sahibkarlıq fəaliyyəti ilə məşğul olmağa və orada yaşamağa maraq göstərəcəklər. Beləliklə, Naxçıvanla Türkiyə arasında birbaşa nəqliyyat əlaqələrinin qurulması, Zəngəzur istiqamətində yolların açılması həmin ərazilərdə iqtisadi və sosial həyatın canlanmasına şərait yaradacaq. Nəticədə yeni iş yerləri yaranacaq, ticarət genişlənəcək və Böyük Qayıdış prosesi əlavə stimul qazanacaq”.
Ayhan
14:00 09.11.2026
Oxunuş sayı: 37
