Azərbaycan-Ermənistan münasibətlərində yenidən qarşıdurma yarana bilər - Bədbin proqnoz
Ermənistanda “Güclü Ermənistan” Partiyasının lideri Samvel Karapetyanın və parlament fraksiyasının rəhbəri Narek Karapetyanın evlərində aparılan axtarışlar ölkənin siyasi gündəmində yeni gərginlik yaradıb. İstintaq Komitəsinin başladığı əməliyyatlar hakimiyyətlə müxalifət arasındakı münasibətlərin hansı mərhələdə olduğunu və ölkədə baş verən siyasi proseslərin istiqamətini yenidən müzakirəyə çıxarıb. Bəs bu axtarışların arxasında hansı səbəblər dayanır, Ermənistanda siyasi mübarizə hansı istiqamətdə inkişaf edir və baş verənlər ölkənin gələcək siyasi mənzərəsinə necə təsir göstərə bilər?
Politoloq Əhəd Məmmədli Crossmedia.az-a açıqlamasında qeyd edib ki, Ermənistan baş naziri Niko lPaşinyan seçkilərdə qalib gəldikdən sonra referendum keçirmək və Ermənistanın siyasi məkanını Rusiyanın təsir dairəsində olan qüvvələrdən təmizləmək istəyir: “Çünki o, referendum keçirəcəyinə söz verib və bu referendumun nəticələri Azərbaycanın da maraqlarına uyğun olmalıdır. Əks halda, Azərbaycan-Ermənistan münasibətlərində yenidən qarşıdurma yarana bilər. Düşünürəm ki, Paşinyan həm bu amili, həm də Rusiyadan qaynaqlanan təhlükəni nəzərə alaraq hərəkət edir. Çünki Paşinyan, demək olar ki, Qərbin layihəsidir. Qərb isə belə layihələr vasitəsilə müəyyən siyasi məqsədlərinə çatmağa çalışır. Əsas məsələ ondan ibarətdir ki, Paşinyanın hakimiyyətə gəlməsində və hakimiyyətdə möhkəmlənməsində maraqlı olan, ona dəstək verən qüvvələrin də müəyyən gözləntiləri, tələbləri və arzuları var. Həmin tələblərdən biri də postsovet məkanında Rusiyanın təsirinin zəiflədilməsi, bu ölkələrin Qərbə yaxınlaşdırılması və Qərbin maraqlarına uyğun siyasət yürütməsidir. Qərbə yaxınlaşmaq heç də o demək deyil ki, Avropa və ya ABŞ postsovet ölkələrini dərhal NATO-ya, yaxud Avropa İttifaqına qəbul edəcək. Təbii ki, belə bir addım atılmır. Biz bunu Ukrayna nümunəsində gördük, Gürcüstanın da təcrübəsində müşahidə etdik. Qərb həmin ölkələri özünə daha yaxın, təsir dairəsində olan dövlətlər kimi görmək istəyir və müvafiq gözləntilərinin yerinə yetirilməsini tələb edir. Paşinyanın üzərinə düşən tələblərdən və gözləntilərdən biri də, şübhəsiz ki, Rusiyanın Ermənistanın siyasi məkanındakı təsirinin aradan qaldırılmasıdır. Təbii ki, Paşinyan bunu birdən-birə edə bilmir. Bunun obyektiv səbəbləri var. Onun hələlik nə buna kifayət qədər gücü, nə də cəsarəti çatır. O, eyni zamanda hər iki siyasi platformada mövqeyini qorumağa çalışır”.
Politoloq qeyd edib ki, Rusiya lideri Vladimir Putin də məhz buna görə son görüşündə Paşinyandan konkret seçim etməyi tələb etdi: “Avropa İttifaqı, yoxsa Avrasiya İqtisadi İttifaqı? Paşinyan isə cavabında bildirdi ki, hazırda Ermənistanın qarşısında belə bir seçim məsələsi yoxdur. Putin isə bu yanaşma ilə razılaşmır. Çünki o, Paşinyanın hər iki tərəflə münasibətləri paralel şəkildə davam etdirmək istədiyini yaxşı anlayır. Paşinyan bir tərəfdən öz siyasi oyununu quraraq Ermənistanda Rusiyanın təsirini zəiflətmək, digər tərəfdən isə Qərbin mövqelərini gücləndirmək istəyir. Hazırda mən prosesi məhz bu şəkildə qiymətləndirirəm. Ancaq Paşinyanın bu siyasəti nə dərəcədə uğurla həyata keçirə biləcəyi onun siyasi məharətindən, çevikliyindən və manevr imkanlarından asılıdır. Bununla belə, mən bu məsələyə kifayət qədər skeptik yanaşıram. Hesab edirəm ki, Rusiya Federasiyası zəifləməyənə və ya parçalanma prosesi ilə üzləşməyənə qədər heç bir Paşinyan Rusiyanın təsirini Ermənistandan tamamilə çıxara bilməyəcək. Ən azı, bunun üçün lazımi siyasi cəsarəti göstərmək çətin olacaq. Bunun üçün ilk növbədə Rusiyanın Ermənistandakı hərbi mövcudluğu, ardınca isə iqtisadi təsirləri aradan qaldırılmalıdır. Bu baş verməyənə qədər Ermənistanın Rusiyanın təsir dairəsində qalmaqda davam edəcəyini düşünürəm”.
Ayhan
20:00 05.11.2026
Oxunuş sayı: 61
