Yasamal rayonunda “Şanlı Zəfərimiz – qürur və iftixar tariximiz!” adlı tədbir keçirilib
“Şəhərsalma və Memarlıq İli” çərçivəsində Yeni Azərbaycan Partiyası (YAP) Yasamal Rayon Təşkilatının, Səhiyyə Nazirliyi İctimai Səhiyyə və İslahatlar Mərkəzinin və Azərbaycan Səhiyyə İşçiləri Həmkarlar İttifaqı Respublika Komitəsinin birgə təşkilatçılığı ilə 8 Noyabr-Zəfər Gününə həsr olunmuş “Şanlı Zəfərimiz – qürur və iftixar tariximiz!” adlı tədbir keçirilib.
Crossmedia.az xəbər verir ki, tədbirdə YAP Yasamal rayon təşkilatının sədri Bəxtiyar Nəbiyev, İctimai Səhiyyə və İslahatlar Mərkəzinin direktoru Səbinə Babazadə, Azərbaycan Səhiyyə İşçiləri Həmkarlar İttifaqı Respublika Komitəsinin sədr müavini Cavid Məmmədov, Xüsusi Təyinatlı Qüvvələrin baş leytenantı, Vətən Müharibəsi Qəhrəmanı, “Mətbuat pr. 40” ünvanı üzrə (Azərbaycan Respublikası Müdafiə Sənayesi Nazirliyi) ərazi partiya təşkilatının sədri Qəzənfər Ağayev, Partiya üzvləri və mərkəzin əməkdaşları iştirak edib.
Tədbir Azərbaycan Respublikasının Dövlət Himninin səsləndirilməsi ilə başlayıb. Daha sonra Ulu Öndər Heydər Əliyevin və Azərbaycanın ərazi bütövlüyü uğrunda canlarından keçmiş şəhidlərimizin əziz xatirəsi bir dəqiqəlik sükutla yad edilib.
Tədbiri giriş sözü ilə açan İctimai Səhiyyə və İslahatlar Mərkəzinin direktoru Səbinə Babazadə qonaqları salamlayaraq Zəfər Gününün xalqımızın tarixindəki müstəsna əhəmiyyətindən, Prezident, Müzəffər Ali Baş Komandan cənab İlham Əliyevin rəhbərliyi ilə 44 günlük Vətən müharibəsində qazanılmış möhtəşəm Qələbənin milli qürur və həmrəyliyimizin təntənəsi olmasından bəhs edib. O, bildirib ki, bu tarixi Qələbə Azərbaycan xalqının sarsılmaz iradəsini, dövlətimizin gücünü və ordumuzun qüdrətini bütün dünyaya nümayiş etdirib. Səbinə Babazadə, həmçinin belə tədbirlərin gənc nəslin vətənpərvərlik ruhunda formalaşması, tarixi yaddaşın qorunması və Zəfər salnaməsinin gələcək nəsillərə çatdırılması baxımından mühüm əhəmiyyət daşıdığını vurğulayıb.
Çıxış edən YAP Yasamal rayon təşkilatının sədri Bəxtiyar Nəbiyev Müzəffər Ali Baş Komandan İlham Əliyevin rəhbərliyi ilə rəşadətli Azərbaycan Ordusunun qazandığı tarixi Zəfərin dövlətçilik tariximizdə açdığı yeni səhifədən, bu Qələbənin siyasi, hərbi və mənəvi əhəmiyyətindən geniş bəhs edib. O bildirib ki, 44 günlük Vətən müharibəsində əldə olunan Qələbə Ulu Öndər Heydər Əliyevin müəyyənləşdirdiyi güclü dövlətçilik strategiyasının və Prezident İlham Əliyevin uğurlu siyasətinin məntiqi nəticəsidir. Natiq vurğulayıb ki, xalqımızın milli birliyi, ordumuzun qəhrəmanlığı və Ali Baş Komandanın qətiyyətli rəhbərliyi tarixi Zəfərin əldə olunmasında həlledici rol oynayıb. Bəxtiyar Nəbiyev həmçinin işğaldan azad edilmiş ərazilərimizdə aparılan genişmiqyaslı bərpa və quruculuq işlərinə toxunaraq Birinci vitse-prezident Mehriban xanım Əliyevanın və rəhbərlik etdiyi Heydər Əliyev Fondunun bu istiqamətdə həyata keçirdiyi mühüm layihələrin əhəmiyyətini vurğulayıb. O bildirib ki, Qarabağ və Şərqi Zəngəzurda aparılan tikinti-quruculuq işləri Azərbaycanın iqtisadi qüdrətinin, siyasi iradəsinin və gələcəyə hesablanmış inkişaf strategiyasının bariz göstəricisidir.O, Yeni Azərbaycan Partiyasının Zəfər ideologiyasının təbliğində, milli həmrəyliyin möhkəmləndirilməsində və gənclərin vətənpərvərlik ruhunda tərbiyəsində fəal iştirak etdiyini diqqətə çatdırıb.
Çıxış edən Azərbaycan Səhiyyə İşçiləri Həmkarlar İttifaqı Respublika Komitəsinin sədr müavini Cavid Məmmədov Vətən müharibəsi dövründə səhiyyə işçilərinin, həkimlərin və tibb personalının göstərdiyi fədakarlıqlardan söz açıb. O qeyd edib ki, müharibə zamanı tibb işçiləri həm ön cəbhədə, həm də arxa cəbhədə üzərlərinə düşən məsuliyyəti böyük peşəkarlıq və vətəndaşlıq borcu ilə yerinə yetiriblər. Yaralı hərbçilərə vaxtında və keyfiyyətli tibbi yardımın göstərilməsi, qazilərimizin sağlamlıqlarının bərpası və hərbi qulluqçuların tibbi təminatının təşkili Qələbəyə xidmət edən mühüm amillərdən olub. Cavid Məmmədov səhiyyə əməkdaşlarının bu fədakarlığının xalqımızın Zəfər tarixinin ayrılmaz hissəsi olduğunu vurğulayaraq onların əməyinin daim yüksək qiymətləndirilməsinin vacibliyini diqqətə çatdırıb.
Tədbirdə çıxış edən Xüsusi Təyinatlı Qüvvələrin baş leytenantı, Vətən Müharibəsi Qəhrəmanı, “Mətbuat pr. 40” ünvanı üzrə (Azərbaycan Respublikası Müdafiə Sənayesi Nazirliyi) ərazi partiya təşkilatının sədri Qəzənfər Ağayev döyüş yolundan, Vətən müharibəsi zamanı yaşadığı unudulmaz anlardan və tarixi Qələbənin sevincindən bəhs edərək xatirələrini bölüşüb. O, Azərbaycan əsgərinin yüksək döyüş ruhunun, Vətənə sonsuz bağlılığının və torpaqlarımızın azadlığı uğrunda nümayiş etdirdiyi misilsiz qəhrəmanlığın Zəfərin əsas amillərindən olduğunu bildirib. Qəzənfər Ağayev qeyd edib ki, Vətən müharibəsi hər bir Azərbaycan vətəndaşına milli birliyin, həmrəyliyin və Vətən sevgisinin nə qədər böyük gücə malik olduğunu bir daha nümayiş etdirib. O, gəncləri ölkəmizin tarixi Qələbəsini daim uca tutmağa, dövlətçiliyimizə sədaqətlə xidmət etməyə, Vətənin müdafiəsinə hər zaman hazır olmağa çağırıb.
Çıxışlardan sonra Yeni Azərbaycan Partiyası sıralarına yeni qəbul olunmuş üzvlərə üzvlük vəsiqələri təqdim edilib. Eyni zamanda, fəal partiya üzvləri, səhiyyə və həmkarlar ittifaqı nümayəndələri fəxri fərman və hədiyyələrlə təltif olunublar.
Tədbir çərçivəsində Vətən müharibəsinə və tarixi Zəfərimizə həsr olunmuş videoçarx nümayiş etdirilib.
Sonda Yeni Azərbaycan Partiyasının Himni səsləndirilib və xatirə şəkli çəkdirilib.
18:08 05.11.2026
Oxunuş sayı: 86
