Ukrayna hakimiyyətində təşviş: Avropada seçkilər yaxınlaşır
Ukrayna Prezidenti Volodimir Zelenskinin hakim “Xalqın xidmətçisi” partiyasındakı tərəfdarları 2027-ci ildə Avropanın aparıcı ölkələrində keçiriləcək seçkilərin Kiyevə ayrılan maliyyə yardımına mənfi təsir göstərə biləcəyindən ehtiyat edirlər.
Crossmedia.az xəbər verir ki, “Ukrainska Pravda” nəşri bu barədə hakim partiyadakı mənbələrinə istinadən məlumat yayıb.
Məlumata görə, Ukrayna rəhbərliyində gələn il Avropada sağçı populist qüvvələrin hakimiyyətə gəlməsi ehtimalı narahatlıq doğurur.
“Hazırda avropalılarla əlavə maliyyə yardımı barədə razılığa gəlməyə çalışmalıyıq. Bunu əvvəlcədən etmək daha məqsədəuyğundur. Çünki gələn il Avropanın əsas ölkələrində seçkilər başlayacaq və Ukrayna üçün çox gözlənilməz vəziyyət yarana bilər”, – deyə hakim partiyanın nümayəndələrindən biri bildirib.
Mənbə qeyd edib ki, Avropanın hazırkı siyasi rəhbərliyi Ukraynaya maliyyə dəstəyini davam etdirsə də, götürülmüş öhdəlikləri tam şəkildə yerinə yetirməkdə çətinlik çəkir.
Nəşrin məlumatına əsasən, Kiyev əlavə maliyyə ehtiyaclarını Avropa ölkələrinin uzunmüddətli büdcə planlarına daxil etdirməyə çalışır. Məqsəd gələcəkdə hakimiyyət dəyişikliyi baş versə belə, Ukraynaya ayrılan vəsaitlərin dayandırılmasını çətinləşdirməkdir.
Bildirilir ki, Ukrayna rəhbərliyi 2027-ci il üçün Avropadan əlavə 70 milyard avro maliyyə dəstəyi almağa çalışır.
Bundan əvvəl Ukrayna hakimiyyətinin Rusiya ilə müharibənin başa çatdırılması üzrə mümkün sülh razılaşması çərçivəsində Avropa İttifaqına mərhələli inteqrasiya variantını nəzərdən keçirdiyi də məlum olub. Bu ssenaridə Kiyevin vahid Avropa bazarına çıxışı müəyyən tələblərin yerinə yetirilməsindən asılı olaraq mərhələlərlə təmin edilə bilər.
18:20 05.11.2026
Oxunuş sayı: 59
