Rusiya Mərkəzi Bankının rəhbəri uçot dərəcəsinin azaldılmasına tələsməməyi tövsiyə edib
Rusiya Mərkəzi Bankının rəhbəri Elvira Nabiullina uçot dərəcəsinin azaldılmasına tələsməyin iqtisadiyyata mənfi təsir göstərə biləcəyini bildirib.
Crossmedia.az xəbər verir ki, TASS bu barədə məlumat yayıb.
Nabiullina bu fikirləri Dövlət Dumasında çıxışı zamanı səsləndirib. Onun sözlərinə görə, hazırda Rusiya iqtisadiyyatında həddindən artıq soyuma əlamətləri müşahidə olunmur.
Mərkəzi Bank rəhbəri qeyd edib ki, işsizliyin artması, əhalinin real gəlirlərinin azalması və inflyasiyanın hədəf göstəricidən aşağı düşməsi iqtisadi aktivliyin həddindən artıq zəifləməsinə işarə edə bilər.
O, qiymətlərin kəskin artımını mümkün vergi növləri arasında ən ədalətsizi adlandırıb. Bildirib ki, bu proses xüsusilə əhalinin ən həssas təbəqələrinə zərər vurur.
Nabiullinanın sözlərinə görə, istehsal güclərinin bərpası və əmək məhsuldarlığının yüksəlməsi inflyasiya risklərini azaldaraq uçot dərəcəsinin gələcəkdə aşağı salınmasına imkan yarada bilər.
O bildirib ki, Mərkəzi Bankın baza ssenarisinə əsasən, 2027-ci ildə uçot dərəcəsi azalsa da, ikirəqəmli səviyyədə qalacaq. Kredit artımının da gələn il mülayim tempdə davam etməsi gözlənilir.
Mərkəzi Bank rəhbəri Rusiyada işçi qüvvəsi çatışmazlığının müəyyən qədər azaldığını, lakin yaxın gələcəkdə bu problemin tam aradan qalxacağına dair əlamətlərin olmadığını vurğulayıb.
Nabiullina, həmçinin dondurulmuş aktivlərin qaytarılması istiqamətində işlərin davam etdiyini və investorların aktivlərinin əhəmiyyətli hissəsinin müxtəlif üsullarla geri qaytarıldığını qeyd edib.
20:04 09.11.2026
Oxunuş sayı: 37
