Ermənistanın növbəti öhdəliyi: Sülh üçün bunu da etməlidir
Ermənistan və Azərbaycan arasında münasibətlərin normallaşdırılması və sülh müqaviləsinin imzalanması istiqamətində aparılan proses regionun gələcək təhlükəsizliyi və sabitliyi baxımından mühüm əhəmiyyət daşıyır. Tərəflər arasında müəyyən razılaşmalar əldə olunsa da, hələ də həllini gözləyən məsələlər mövcuddur. Bu məsələlər sırasında Azərbaycanın əsas tələblərindən biri olan mina xəritələrinin təqdim edilməsi xüsusi yer tutur. Çünki işğaldan azad edilmiş ərazilərdə mina təhlükəsi bu gün də insanların həyatına, təhlükəsizliyinə və bərpa-quruculuq işlərinə ciddi təhdid yaradır. Ermənistan mina xəritələrini Azərbaycana təqdim etmədən sülh prosesinin irəliləməsi nə dərəcədə mümkündür? Ümumiyyətlə, bu məsələnin həll olunmaması gələcək münasibətlərə və regional təhlükəsizliyə necə təsir göstərə bilər?
Mövzu ilə bağlı Crossmedia.az-a açıqlama verən Milli Məclisin deputatı Ülviyyə Həmzəyeva qeyd edib ki, Azərbaycan və Ermənistan arasında münasibətlərin normallaşması və sülh prosesində əldə olunan irəliləyişlər regionun gələcəyi baxımından mühüm əhəmiyyət daşıyır: “Lakin sülh yalnız siyasi razılaşmalarla məhdudlaşmamalı, insanların təhlükəsiz həyatında da öz əksini tapmalıdır.
Bu baxımdan Ermənistanın mina xəritələri ilə bağlı məsələyə aydınlıq gətirməsi xüsusi əhəmiyyət kəsb edir. Azərbaycan tərəfinin dəfələrlə bəyan etdiyi kimi, indiyədək təqdim olunmuş xəritələr natamam və qeyri-dəqiqdir. Bu isə insanların həyatı üçün ciddi təhlükə yaratmaqla yanaşı, azad edilmiş ərazilərdə bərpa-quruculuq işlərini və Böyük Qayıdış prosesini çətinləşdirir.
Sual yaranır - İnsanların həyatı üçün təhlükə yaradan mina problemi həll edilmədən davamlı və etibarlı sülhdən danışmaq nə dərəcədə mümkündür?
Hesab edirəm ki, Ermənistanın sərəncamında olan bütün dəqiq mina məlumatlarını təqdim etməsi və bu istiqamətdə konstruktiv əməkdaşlıq göstərməsi qarşılıqlı etimadın möhkəmlənməsinə mühüm töhfə verər.
Azərbaycan regionda davamlı sülhün və sabitliyin tərəfdarıdır. Lakin unutmamalıyıq ki, əsl sülh yalnız silahların susması deyil, insanların öz doğma torpaqlarında qorxu və təhlükə olmadan yaşaya bilməsidir”.
Ayhan
19:00 09.11.2026
Oxunuş sayı: 42
