Zelenski və Modi Qara dənizdə taxıl dəhlizinin bərpasını müzakirə edib
Ukrayna Prezidenti Volodimir Zelenski Hindistanın Baş naziri Narendra Modi ilə telefon danışığında Qara dənizdə taxıl dəhlizinin fəaliyyətinin bərpası məsələsini müzakirə edib.
Crossmedia.az xəbər verir ki, Zelenski bu barədə özünün “Telegram” kanalında məlumat yayıb.
Onun sözlərinə görə, tərəflər Rusiya-Ukrayna müharibəsinin başa çatdırılması istiqamətində diplomatik səyləri və Hindistanın bu prosesə verə biləcəyi töhfəni müzakirə ediblər.
Zelenski ərzaq təhlükəsizliyinin əməkdaşlıq istiqamətlərindən biri ola biləcəyini bildirib. O, Rusiyanın Qara dənizdə taxıl ixracına maneələr yaratdığını qeyd edərək, Hindistanın ərzaq dəhlizlərinin yaradılmasında vasitəçilik etməyə hazır olduğunu vurğulayıb.
Ukrayna Prezidenti Rusiyanın dəniz yollarını bloklamasının həm ölkə iqtisadiyyatına, həm də dünyanın müxtəlif yerlərində yaşayan yüz milyonlarla insana zərər vurduğunu anlamalı olduğunu deyib.
Zelenski əlavə edib ki, müzakirə olunan məsələlər və digər ikitərəfli mövzularla bağlı tərəflərin nümayəndə heyətləri əlaqə saxlayacaqlar.
Narendra Modi də telefon danışığından sonra “X” sosial şəbəkəsində paylaşım edərək Hindistanın Moskva ilə Kiyev arasında münaqişənin nizamlanmasına dəstək verməyə hazır olduğunu bildirib.
O, Zelenski ilə məhsuldar söhbət apardığını, davam edən münaqişə, humanitar məsələlər və sülhün bərqərar olması istiqamətindəki səylərlə bağlı fikir mübadiləsi apardıqlarını qeyd edib.
Hindistanın Baş naziri ölkəsinin münaqişənin sülh yolu ilə həllinə bütün mümkün vasitələrlə töhfə vermək öhdəliyinə sadiq olduğunu bir daha vurğulayıb.
19:29 09.11.2026
Oxunuş sayı: 36
