Gündəm
Soltan Məmmədov: Üçrəngli bayrağımız müstəqil dövlətçiliyimizin və milli birliyimizin rəmzidir
9 Noyabr – Azərbaycan Respublikasının Dövlət Bayrağı Günü xalqımızın dövlətçilik tarixini, milli kimliyini və müstəqillik ideallarını özündə əks etdirən üçrəngli bayrağımıza ehtiramın ifadəsidir. Dövlət bayrağı hər bir ölkənin suverenliyini, tarixi varisliyini və milli birliyini ifadə edən əsas rəmzlərdən biridir. Azərbaycanın üçrəngli bayrağı da xalqımızın milli özünüdərkini, müstəqil dövlətçilik iradəsini və vahid Azərbaycan ideyasını özündə birləşdirir.
Günün əhəmiyyəti ilə bağlı Crossmedia.az-a açıqlama verən Milli Məclisin deputatı Soltan Məmmədov qeyd edib ki, 1918-ci il noyabrın 9-da Azərbaycan Xalq Cümhuriyyəti tərəfindən qəbul edilmiş üçrəngli bayraq müstəqil dövlətçilik tariximizin mühüm rəmzinə çevrilmişdir: “Cümhuriyyətin süqutundan sonra dövlət müstəqilliyimizin rəmzi olan bu bayrağın yenidən siyasi və ictimai gündəmə gətirilməsi, dövlətçilik ənənələrinin bərpası baxımından mühüm əhəmiyyət daşıyırdı”.
Deputatın sözlərinə görə, bu prosesdə Ümummilli Lider Heydər Əliyevin təşəbbüsü və siyasi iradəsi həlledici rol oynayıb: “1990-cı il noyabrın 17-də Ulu Öndərin rəhbərliyi ilə Naxçıvan Muxtar Respublikası Ali Məclisinin sessiyasında üçrəngli bayrağın Naxçıvan Muxtar Respublikasının Dövlət Bayrağı kimi qəbul edilməsi barədə qərar verilib. Eyni zamanda, bayrağın Azərbaycan Respublikasının dövlət rəmzi kimi təsdiq olunması ilə bağlı ali qanunverici orqana müraciət ünvanlanıb. 1991-ci il fevralın 5-də üçrəngli bayrağın Azərbaycan Respublikasının Dövlət Bayrağı kimi qəbul edilməsi isə milli dövlətçilik ənənələrinin bərpası istiqamətində atılmış bu addımın ölkə səviyyəsində rəsmiləşdirilməsi oldu. Bu gün dövlət bayrağımızın əhəmiyyəti yalnız tarixi irslə məhdudlaşmır. Prezident, Müzəffər Ali Baş Komandan İlham Əliyevin rəhbərliyi ilə Azərbaycanın ərazi bütövlüyünün və suverenliyinin tam bərpa olunması üçrəngli bayrağın ölkəmizin bütün ərazisində dalğalanmasını təmin edib. Qarabağda, Şərqi Zəngəzurda və beynəlxalq platformalarda dalğalanan bayrağımız müstəqil dövlətimizin suverenliyini, xalqımızın birliyini və dövlətçilik iradəsini nümayiş etdirir”.
Soltan Məmmədovun fikrincə, dövlət bayrağına ehtiram, ilk növbədə, onun ifadə etdiyi müstəqillik dəyərlərinə, milli birliyə və dövlətçilik ənənələrinə bağlılığın göstəricisidir: “Bu dəyərlərin qorunması və gələcək nəsillərə ötürülməsi hər bir vətəndaşın məsuliyyətidir”.
Ayhan
19:41 09.11.2026
Oxunuş sayı: 45
