Livan-Suriya sərhədindəki keçid məntəqəsi iki ildən sonra açılıb
Livanla Suriya arasında yerləşən Əbbudiyyə-Debbusiye sərhəd-keçid məntəqəsi təxminən iki illik fasilədən sonra yenidən fəaliyyətə başlayıb.
Crossmedia.az xəbər verir ki, “Anadolu” agentliyi bu barədə məlumat yayıb.
İsrailin 2024-cü ilin noyabrında həyata keçirdiyi hücum nəticəsində bağlanan keçid məntəqəsi zədələnmiş körpünün təmiri və infrastruktur işlərinin tamamlanmasından sonra açılıb.
Açılış mərasimində Livanın ictimai işlər və nəqliyyat naziri Fayiz Rasamni, Suriyanın Sərhəd Keçidləri və Gömrük İdarəsinin nümayəndələri, eləcə də hər iki ölkənin digər rəsmi şəxsləri iştirak ediblər.
Rasamni bildirib ki, keçid məntəqəsinin açılması Livan və Suriya arasında mühüm əlaqə xəttinin bərpası baxımından əhəmiyyətlidir. Onun sözlərinə görə, məntəqədən gündəlik 8 mindən çox insanın istifadə edəcəyi, 150-dən artıq yük maşınının keçid edəcəyi gözlənilir.
Livanlı nazir qeyd edib ki, keçidin fəaliyyətə başlaması Suriyanın Homs vilayəti və sahil bölgəsi üçün də əhəmiyyət daşıyır. O, noyabrın 15-də Kuleyat hava limanının açılması ilə nəqliyyat sahəsində daha bir addım atılacağını bildirib.
Suriyanın Gömrük İdarəsinin rəhbəri Xalid əl-Bərad isə keçidin ticarət yüklərinin daşınmasını və iki ölkə arasında sərnişin hərəkətini asanlaşdıracağını vurğulayıb.
Sərhəd-keçid məntəqəsinin yenidən açılması Livanın şimalı ilə Suriyanın mərkəzi bölgələri arasında daha qısa marşrut yaradacaq. Həmçinin Suriya istehsal bölgələrinin Livanın şimalı və Tripoli limanı ilə əlaqəsinin güclənəcəyi gözlənilir.
Yeni marşrutun yükdaşımalar zamanı məsafə və xərcləri azaltmaqla iki ölkə arasındakı ticarət və tranzit əlaqələrini canlandıracağı, Dəməşqə açılan Masnaa sərhəd-keçid məntəqəsindəki sıxlığı isə azaldacağı proqnozlaşdırılır.
Qeyd edək ki, Livan və Suriya arasında ümumilikdə beş sərhəd-keçid məntəqəsi var. Əbbudiyyə-Debbusiye keçidi 2024-cü ilin noyabrında İsrailin hücumu zamanı iki ölkəni birləşdirən körpünün zədələnməsi səbəbindən fəaliyyətini dayandırmışdı.
20:24 09.11.2026
Oxunuş sayı: 37
