Azərbaycanın iki cüdo hakimi beynəlxalq dərəcəli hakim adını qazanıb
Azərbaycanın cüdo hakimləri İslam Nəcəfquliyev və Vilayət Rəhimli beynəlxalq imtahanları uğurla başa vuraraq “B” kateqoriyalı hakim statusu əldə ediblər.
Crossmedia.az xəbər verir ki, bu barədə Azərbaycan Cüdo Federasiyası məlumat yayıb.
Noyabrın 6–8-də Macarıstanın Dyör şəhərində Beynəlxalq Cüdo Federasiyasının (IJF) seminar və imtahan proqramı keçirilib. Proqram çərçivəsində hakimlərin nəzəri bilikləri və praktiki hazırlığı qiymətləndirilib.
Seminarda yarış qaydalarının tətbiqi, texniki fəndlərin qiymətləndirilməsi və müxtəlif görüş vəziyyətlərində qərarların verilməsi video nümunələr əsasında təhlil olunub.
Noyabrın 7–8-də isə praktiki sınaqlar Dyördə keçirilən yeniyetmələr arasında Avropa Kuboku yarışları zamanı təşkil edilib. Bu mərhələdə hakimlərin qaydaları düzgün tətbiq etməsi, tatamidə mövqe seçimi, qərarların ardıcıllığı və görüşləri idarə etmək bacarıqları qiymətləndirilib.
Bütün mərhələləri uğurla tamamlayan İslam Nəcəfquliyev və Vilayət Rəhimliyə “B” kateqoriyalı beynəlxalq dərəcəni təsdiqləyən diplomlar, həmçinin müvafiq qalstuk və döş nişanları təqdim olunub.
22:50 09.11.2026
Oxunuş sayı: 51
