Ukrayna Rusiyanın ikinci ən böyük neft emalı zavodunu vurub
Ukrayna pilotsuz uçuş aparatları Rusiyanın Leninqrad vilayətində yerləşən Kirişi neft emalı zavoduna hücum edib, nəticədə müəssisənin üç əsas emal qurğusu zədələnib və ərazidə güclü yanğın başlayıb.
Crossmedia.az xəbər verir ki, “Euronews” bu barədə məlumat yayıb.
Leninqrad vilayətinin qubernatoru Aleksandr Drozdenkonun sözlərinə görə, hava hücumundan müdafiə qüvvələri bölgəyə yönələn 113 dronu vurub. Lakin onlardan birinin qalıqları Vsevolojsk şəhərində çoxmərtəbəli binanın damına düşüb. Hadisə nəticəsində bir sakin həyatını itirib.
Kirişi neft emalı zavodu Rusiyanın şimal-qərbindəki ən böyük, ölkə üzrə isə Omsk zavodundan sonra ikinci ən böyük emal müəssisəsidir. “Surgutneftegaz” qrupuna məxsus zavod ildə təxminən 18 milyon ton xam neft emal edir ki, bu da Rusiyanın ümumi emal gücünün təxminən 7 faizini təşkil edir.
Müəssisədə benzin, dizel yanacağı, aviasiya kerosini, mazut, bitum və neft-kimya məhsulları istehsal olunur. Zavod Sankt-Peterburqun Pulkovo hava limanını da aviasiya yanacağı ilə təmin edir.
Rusiya Müdafiə Nazirliyi isə gecə ərzində 14 regionda və işğal altındakı Krımda Ukraynaya məxsus 430 dronun vurulduğunu açıqlayıb. “Euronews” bu məlumatı müstəqil şəkildə təsdiqləyə bilmədiyini bildirib.
Digər tərəfdən, Rusiyanın “Rosneft” şirkəti altı regiondakı yanacaqdoldurma məntəqələrində benzin və dizel satışına məhdudiyyət tətbiq edib. Rusiya mediasının məlumatına görə, Kareliya, Buryatiya, Zabaykalye diyarı, Novosibirsk, Arxangelsk və Penza vilayətlərində qüvvəyə minən qaydalara əsasən, şəhərlərdə bir alış zamanı 30 litr, magistral yollarda isə 50 litr yanacaq almaq mümkündür.
Leninqrad vilayətinin hakimiyyət orqanları da yanacaqdoldurma məntəqələrinə satışın benzin üçün 30 litr, dizel üçün isə 50 litr həddində məhdudlaşdırılmasını tövsiyə edib.
Ukrayna Hərbi Hava Qüvvələrinin məlumatına görə, Rusiya qüvvələri bazar ertəsi axşamından etibarən Ukraynaya 317 pilotsuz uçuş aparatı buraxıb. Onlardan 276-sı vurulub. Hücumlar nəticəsində Odessa, Dnepropetrovsk, Xarkov, Zaporojye, Poltava və Sumı vilayətlərində ölən və yaralananlar olub.
21:15 09.11.2026
Oxunuş sayı: 44
