BMT rəsmisi: İqlim böhranı pandemiya miqyaslı sağlamlıq təhlükəsinə çevrilib
İqlim dəyişikliyi bütün dünyada insanların sağlamlığı üçün getdikcə daha böyük təhlükə yaradır və səhiyyə sistemlərini ciddi təzyiq altında qoyur.
Crossmedia.az xəbər verir ki, “Euronews” bu barədə məlumat yayıb.
BMT-nin İqlim Dəyişikliyi üzrə İcraçı katibi Saymon Stiell bu barədə Türkiyənin Antalya şəhərində keçirilən COP31 sammitində çıxışı zamanı bildirib.
Onun sözlərinə görə, hava çirklənməsindən tutmuş ekstremal istilərə qədər iqlim dəyişikliyinin müxtəlif təsirləri dünya əhalisinin sağlamlığına təhlükə yaradır. Stiell iqlim böhranının artıq pandemiya miqyaslı qlobal sağlamlıq böhranına çevrildiyini vurğulayıb.
O qeyd edib ki, iqlim fəlakətləri səhiyyə sistemlərinə və infrastrukturuna ciddi zərər vurur. Bu səbəbdən ölkələr sağlamlığın iqlim siyasətinin mərkəzində dayanmasını təmin etməlidir.
“Lancet Countdown 2026” hesabatına əsasən, açıq havanın çirklənməsi və ekstremal istilər vasitəsilə fosil yanacaqların yandırılması və insan fəaliyyəti nəticəsində yaranan iqlim dəyişikliyi hər il təxminən 3,3 milyon insanın ölümü ilə əlaqələndirilir.
Ümumdünya Meteorologiya Təşkilatının noyabrın 9-da dərc etdiyi yeni hesabatda isə son 12 ilin müşahidələr tarixində ən isti illər olduğu, 2026-cı il də daxil olmaqla son dörd ilin ən isti dövr kimi qeydə alındığı bildirilib.
Stiellin sözlərinə görə, temperaturun yüksəlməsi, quraqlıq və intensiv yağıntılar istiliklə bağlı xəstəliklərə və ölümlərə, meşə yanğınlarından yaranan tüstüyə, ərzaq çatışmazlığına, eləcə də vəba, malyariya və denqe kimi xəstəliklərin yayılma riskinin dəyişməsinə səbəb ola bilər.
O, həmçinin səhiyyə sistemlərinin iqlim risklərinə qarşı dayanıqlı olması üçün uyğunlaşma tədbirlərinin vacibliyini vurğulayıb. Bununla yanaşı, Stiell qeyd edib ki, davamlı istiləşən dünyada heç bir səhiyyə sistemi bütün risklərə qarşı tam dayanıqlı ola bilməz.
BMT rəsmisi ölkələri iqlim planlarının hazırlanmasında, maliyyə qərarlarının qəbulunda və əldə olunan nəticələrin qiymətləndirilməsində sağlamlıq amilini nəzərə almağa çağırıb.
21:22 09.11.2026
Oxunuş sayı: 33
