Azərbaycanın yeniyetmə cüdoçuları Yaponiyada təlim-məşq toplanışına başlayıb
Cüdo üzrə yeniyetmə oğlanlardan ibarət Azərbaycan milli komandası Yaponiyada üç həftəlik beynəlxalq təlim-məşq toplanışına start verib.
Crossmedia.az xəbər verir ki, bu barədə Azərbaycan Cüdo Federasiyası məlumat yayıb.
Hazırlıq prosesində 16 cüdoçu iştirak edir. Komandaya baş məşqçi Emin İskəndərov, məşqçilər Nicat Şıxəlizadə və Kotaro Sasaki rəhbərlik edirlər.
Toplanışın ilk mərhələsi Tokai Universitetinin nəzdində fəaliyyət göstərən Saqami məktəbində təşkil olunur.
Yaponiyada keçirilən məşqlər idmançıların texniki və taktiki bacarıqlarının təkmilləşdirilməsi, beynəlxalq təcrübələrinin artırılması və yüksək rəqabətli məşq mühitinə uyğunlaşması məqsədi daşıyır.
Məşqlərdə fərdi texniki hazırlığa, randori bacarıqlarına, fiziki dözümlülüyə və müxtəlif üslublu rəqiblərlə mübarizə təcrübəsinin artırılmasına xüsusi diqqət yetirilir.
Toplanış yeniyetmə cüdoçuların qarşıdakı yarışlara hazırlığının, eləcə də gələcəkdə əsas milli komandaya keçidinin mühüm mərhələsi hesab olunur.
21:43 09.11.2026
Oxunuş sayı: 45
