Nənə və babalar nəvə ilə görüşməzdən əvvəl peyvənd olunmalıdırlar
Həkimlər yeni doğulan nəvələri ilə vaxt keçirməyi planlaşdıran nənə və babalara bir sıra peyvəndləri vaxtında vurdurmağı tövsiyə edirlər.
Crossmedia.az xəbər verir ki, “CNN” bu barədə məlumat yayıb.
Mütəxəssislərin sözlərinə görə, körpələr həyatlarının ilk aylarında, xüsusilə də ilk altı ayda yoluxucu xəstəliklərə qarşı daha həssas olurlar. Onların immun sistemi hələ tam formalaşmadığından, ətrafdakı insanların peyvəndli olması körpələrin qorunmasında mühüm rol oynayır.
ABŞ Xəstəliklərə Nəzarət və Profilaktika Mərkəzləri (CDC) yeni doğulmuş körpə ilə təmasda olacaq şəxslərə, xüsusilə göyöskürəyə qarşı Tdap və mövsümi qrip peyvəndlərini vaxtında vurdurmağı tövsiyə edir.
Həkimlər, həmçinin respirator sinsitial virusdan (RSV), COVID-19-dan, qızılca, parotit və məxmərəkdən qoruyan MMR peyvəndinin də əhəmiyyətini vurğulayırlar.
Mütəxəssislər bildirirlər ki, göyöskürək körpələrdə tənəffüsün dayanmasına, pnevmoniyaya, qıcolmalara, beyin zədələnməsinə və hətta ölümə səbəb ola bilər. Qrip və RSV də azyaşlı uşaqlarda ağır fəsadlar yarada bilər.
Həkimlərin tövsiyəsinə əsasən, nənə və babalar peyvənd statuslarını körpə dünyaya gəlməzdən əvvəl yoxlatmalı, mümkün olduqda peyvəndləri doğuşa ən azı 4-6 həftə qalmış vurdurmalıdırlar. Əksər peyvəndlərdən sonra immun cavabın formalaşması təxminən iki həftə çəkir.
Mütəxəssislər peyvəndlə yanaşı, körpə ilə təmasdan əvvəl əlləri yumağı, xəstə olduqda onun yanına getməməyi və üzündən öpməməyi də tövsiyə edirlər.
Bundan əlavə, 50 yaşdan yuxarı şəxslərə zona və pnevmokok infeksiyalarına qarşı peyvəndlərin də yaşa uyğun olaraq nəzərdən keçirilməsi məsləhət görülür.
00:30 10.11.2026
Oxunuş sayı: 19
