Aİ-nin yeni sərhəd sistemi hava limanlarında növbələri artırıb
Şengen zonasına daxil olan Aİ xaricindən səyahətçilər üçün yeni rəqəmsal sərhəd sistemi tətbiq edilir. Biometrik yoxlamaları əhatə edən sistem sərhəd keçidlərini uzadaraq bəzi hava limanlarında uzun növbələrin yaranmasına səbəb olur. Səyahətçilərin saatlarla gözləməsi və uçuşlarını qaçırması halları qeydə alınır.
Crossmedia.az xəbər verir ki, Aİ-nin tətbiq etdiyi Giriş/Çıxış Sistemi (EES) pasportlara əl ilə möhür vurulmasını üz və barmaq izi kimi biometrik məlumatların yoxlanılması ilə əvəz edir. Adi pasport yoxlaması təxminən 60 saniyə çəkdiyi halda, yeni prosedur orta hesabla 90 saniyə davam edir.
Sistemin tətbiqi xüsusilə sıx hava limanlarında yüzlərlə metrə çatan növbələrə və bəzi hallarda beş saata qədər gözləmə müddətinə səbəb olub. Üzv ölkələrdə fərqli texniki avadanlıq və proqram təminatından istifadə edilməsi problemlərin həllini çətinləşdirir.
Yunanıstana adi pasport yoxlamalarından istifadə üçün müvəqqəti istisna verilib. Hakimiyyət orqanları növbələri azaltmaq üçün payız aylarınadək əlavə özünəxidmət köşklərinin quraşdırılmasını planlaşdırır.
06:37 15.08.2026
Oxunuş sayı: 47
