Medvedevdən Kallasa təhqiramiz cavab: O, sadəcə ağılsızdır
Rusiya Təhlükəsizlik Şurası sədrinin müavini Dmitri Medvedev Avropa İttifaqının (Aİ) xarici siyasət və təhlükəsizlik məsələləri üzrə ali nümayəndəsi Kaya Kallası “ağılsız” adlandırıb.
Crossmedia.az xarici KİV-ə istinadən verdiyi xəbərə görə, Medvedev bildirib ki, Kallasın Ukrayna ilə bağlı danışıqlarda iştirakını istəmirlər. Onun sözlərinə görə, buna səbəb Kallasın sərt danışıqlar aparması deyil, guya intellektual qabiliyyətlərinin zəif olmasıdır.
“Heç kim onu istəmir, amma buna səbəb onun sərt danışıqlar aparması deyil, sadəcə axmaq olmasıdır. Ümumiyyətlə, hələlik heç kim Aİ-ni münaqişə ilə bağlı danışıqlara dəvət etməyib”, – Medvedev deyib.
Qeyd edək ki, bundan əvvəl Aİ-nin xarici siyasət rəhbəri Kaya Kallas ABŞ-ın Rusiya ilə danışıqlara institusional vəzifəsi olmayan şəxsləri göndərdiyini bildirib.
Eyni zamanda “Guardian” nəşrinin yazdığına görə, Kallas Ukrayna ilə bağlı danışıqlarda Aİ nümayəndə heyətinin tərkibində yer almaqda israrlıdır. O, Avropa İttifaqının artıq formalaşmış institutlarının olduğunu əsas gətirərək, ABŞ-ın etdiyi kimi, danışıqlara institusional statusu olmayan şəxslərin göndərilməsinin düzgün olmadığını vurğulayıb.
Qeyd edək ki, Kallas Dublində keçirilən sammitdə Rusiyanın onun danışıqlarda iştirakına qarşı çıxmasını da şərh edib. O, Moskvanın danışıqlar masasında güclü şəxsləri görmək istəmədiyini iddia edib.
21:28 13.11.2026
Oxunuş sayı: 117
