Almaniya casusluq və kiberhücumlara qarşı qanunvericiliyi sərtləşdirdi
Almaniya parlamenti ölkənin kəşfiyyat orqanlarının səlahiyyətlərini genişləndirən qanun layihəsini qəbul edib.
Crossmedia.az xarici KİV-ə istinadən xəbər verir ki, qanun layihəsi parlamentdə 309 lehinə, 190 əleyhinə səslə qəbul olunub, 71 deputat bitərəf qalıb.
Yeni qanuna əsasən, Almaniyanın Xarici Kəşfiyyat Xidməti (BND) xarici ölkələrdə fəaliyyət göstərən dövlət dəstəkli haker qruplarının serverlərini sıradan çıxarmaq kimi əməliyyatlar həyata keçirə biləcək.
Konstitusiyanın Mühafizəsi üzrə Federal İdarəyə (BfV) isə müəyyən şərtlər daxilində gizli şəkildə şəxsi yaşayış evlərinə daxil olmaq, partlayıcı və silahlarla bağlı təhlükələrə müdaxilə etmək səlahiyyəti veriləcək. Bununla belə, həbs və açıq axtarış aparmaq hüququ yalnız polisə məxsus olacaq.
Almaniya hökuməti dəyişikliklərin Rusiya və Çin kimi ölkələrdən qaynaqlanan casusluq, sabotaj və kiberhücum təhlükələrinə qarşı mübarizəni gücləndirəcəyini bildirir.
Lakin müxalifət və hüquq müdafiəçiləri yeni səlahiyyətlərin vətəndaş azadlıqlarını məhdudlaşdıra və kəşfiyyat orqanları üzərində nəzarəti zəiflədə biləcəyindən narahatdırlar.
18:45 13.11.2026
Oxunuş sayı: 121
