Valideynlərə xəbərdarlıq – Bu oyuncaqlar təhlükəlidir
Uşaqlar arasında geniş yayılmış və stressi azaltmaq məqsədilə istifadə edilən "Squishy" oyuncaqlarının bəzi nümunələrində sağlamlıq üçün təhlükəli kimyəvi maddələr aşkarlanıb.
Crossmedia.az xarici KİV-ə istinadən xəbər verir ki, Sinqapurda aparılan laboratoriya araşdırması zamanı 18 müxtəlif yumşaq oyuncaq zərərli kimyəvi maddələrin mövcudluğu baxımından yoxlanılıb.
Araşdırma çərçivəsində oyuncaqlarda xərçəng riski ilə əlaqələndirilən benzol və hormonal sistemə, eləcə də uşaqların inkişafına mənfi təsir göstərə bilən ftalatlar araşdırılıb.
Testlər zamanı heç bir oyuncaqda benzol aşkarlanmasa da, bir neçə nümunədə istifadəsi məhdudlaşdırılan plastikləşdirici maddələr müəyyən edilib.
Xüsusilə çəhrayı rəngli oyuncaqlardan birində zərərli maddənin miqdarı Sinqapurda qanunvericiliklə müəyyən edilmiş həddən 1,7 dəfə yüksək olub.
Mütəxəssislər xəbərdarlıq edirlər ki, bu tip oyuncaqların uzun müddət yüksək temperaturda saxlanılması əlavə təhlükələr yarada bilər.
Belə ki, günəş altında park edilmiş avtomobildə qalan oyuncaqlar yumşala, içərisindəki maddələr sıza və ya təzyiq nəticəsində partlaya bilər. Bu isə dəri qıcıqlanmasına və hətta yanıqlara səbəb ola bilər.
Araşdırmanın nəticələrindən sonra təhlükəli məhsulu satan mağaza oyuncağı satışdan çıxarıb və alıcılara ödənişlərin geri qaytarılmasını təklif edib.
Aidiyyəti qurumlar valideynlərə oyuncaq alarkən məhsulun etiketini və təhlükəsizlik məlumatlarını diqqətlə yoxlamağı, oyuncaqları birbaşa günəş şüaları altında saxlamamağı və uşaqların oyun zamanı nəzarətsiz qalmamasını tövsiyə edirlər.
01:00 18.11.2026
Oxunuş sayı: 131