Fransada Lavrovun xəbərdarlığından sonra həyəcan təbili çalındı
Fransanın solçu “Tabe Olmayan Fransa” partiyasının lideri Jan-Lük Melanşon Rusiyanın xarici işlər naziri Sergey Lavrovun xəbərdarlığından sonra ölkəsinin Ukrayna münaqişəsinin birbaşa iştirakçısına çevrilməməli olduğunu bildirib.
Crossmedia.az xəbər verir ki, siyasətçi bu barədə sosial şəbəkənin "X" platformasındakı paylaşımında yazıb.
Melanşon Lavrovun Fransanın Ukraynadakı hərbçilərinin mövcudluğu ilə bağlı açıqlamasına münasibət bildirib.
“Həyəcan! Biz heç bir halda Ukraynadakı hərbi əməliyyatların iştirakçısına çevrilməməliyik”, – deyə o vurğulayıb.
Eyni zamanda Sergey Lavrov noyabrın 17-də Manilada keçirdiyi mətbuat konfransında Fransanın Ukraynada hərbçilərinin olmasından xəbərdar olduqlarını bildirib. Onun sözlərinə görə, Moskva bu məsələ ilə bağlı Parisə xəbərdarlıq edib və belə bir mövcudluğu Ukraynaya dəstək deyil, müharibədə birbaşa iştirak kimi qiymətləndirir.
Məlumatlara görə, Fransa hərbçilərinin kiçik qrupları Ukraynada ukraynalı hərbçilərin hazırlanması və hərbi texnikanın təmiri ilə məşğul olur. Fransa tərəfi isə onların döyüş əməliyyatlarında iştirak etmədiyini bildirir.
Fransanın müdafiə nazirinin müavini Alis Rüfo Lavrovun bu addımı müharibədə birbaşa iştirak kimi qiymətləndirməsini “absurd” adlandırıb.
23:38 17.11.2026
Oxunuş sayı: 36