Amerikanın ən gizli sistemlərindən biri sıradan çıxdı — Kəşfiyyat iflic oldu
ABŞ Milli Təhlükəsizlik Agentliyinin (NSA) əməkdaşlarının məxfi məlumat mübadiləsi üçün istifadə etdiyi daxili rabitə şəbəkəsində ciddi nasazlıq yaranıb.
Crossmedia.az xəbər verir ki, bu barədə CNN telekanalı məlumat yayıb.
Məlumata görə, NSA əməkdaşlarının qurum daxilində məxfi məlumatları ötürməsi üçün istifadə etdiyi “NSA Net” adlı rabitə şəbəkəsi fəaliyyətini dayandırıb.
CNN-ə danışan və hadisədən məlumatlı olan mənbələr sistemdəki nasazlığı təsdiqləyiblər. Hazırda problemin miqyası və yaranma səbəbi araşdırılır.
Bildirilib ki, ilkin mərhələdə hadisənin kiberhücum nəticəsində baş verdiyinə dair hər hansı sübut aşkarlanmayıb. Bununla belə, sistemdəki texniki problemin səbəbi hələ müəyyən edilməyib.
Nasazlıqdan sonra NSA əməkdaşları üçün işə mərhələli başlama qaydası tətbiq olunub.
NSA-nın rabitə şəbəkəsindəki nasazlıq ABŞ-də son günlər baş verən texniki problemlər fonunda diqqət çəkib.
Belə ki, ötən cümə günü Federal Aviasiya Administrasiyasının (FAA) sistemində yaranan nasazlıq səbəbindən ölkə üzrə uçuşlar saatlarla dayandırılmış, minlərlə reys ləğv edilmiş və ya təxirə salınmışdı.
Bundan başqa, “JPMorgan Chase” bankının minlərlə müştərisi onlayn bankçılıq hesablarına daxil olmaqda çətinlik çəkmiş, “Microsoft” xidmətlərində də genişmiqyaslı fasilələr yaşanmışdı.
Qeyd edək ki, indiyədək baş verən texniki nasazlıqlar arasında birbaşa əlaqə olduğuna dair rəsmi sübut açıqlanmayıb.
21:45 17.11.2026
Oxunuş sayı: 44