700 polis səfərbər edildi, metroda qarşıdurma yaşandı – Berlin qarışdı
Almaniyanın paytaxtı Berlində Fələstinə dəstək aksiyasına qatılan şəxslərlə polis arasında qarşıdurma yaşanıb.
Crossmedia.az xəbər verir ki, bu barədə “Son Dakika” nəşri məlumat yayıb.
Bildirilib ki, noyabrın 15-də Berlində keçirilən “Gen Z regelt” adlı yürüşdə Fələstin tərəfdarları da iştirak ediblər. Aksiya zamanı nümayişçilərlə polis arasında gərginlik yaranıb.
Sosial şəbəkələrdə yayılan görüntülərdə xüsusi təyinatlı polis əməkdaşlarının metro vaqonunda bir qrup etirazçıya dəyənəklərlə müdaxilə etdiyi görünür. Dar məkanda polislərin əhatəsində qalan nümayişçilərin zərbələrdən qorunmaqda çətinlik çəkdiyi bildirilib.
Polisin açıqlamasına görə, hadisələrlə əlaqədar azı 20 nəfər saxlanılıb. Aksiya zamanı 28 ayrı hüquq pozuntusu ilə bağlı şikayət qeydə alınıb.
Qarşıdurma nəticəsində azı üç polis əməkdaşının yaralandığı bildirilsə də, nümayişçilər arasında xəsarət alanların olub-olmaması barədə məlumat verilməyib.
Təhlükəsizlik tədbirləri çərçivəsində Berlində aksiyaya təxminən 700 polis əməkdaşı cəlb olunub.
Yürüş zamanı İsrail və Almaniyanın kansleri Fridrix Merts əleyhinə şüarlar səsləndirilib. Aksiya iştirakçılarının polisə qarşı şüarlar da səsləndirdiyi qeyd olunub.
Hadisə ilə bağlı yayılan görüntülər sosial şəbəkələrdə müzakirələrə səbəb olub.
21:52 17.11.2026
Oxunuş sayı: 132