Fransada etirazlar böyüyür: Vətəndaşlar hökumətdən maaş artımı tələb edir
Fransanın paytaxtı Parisdə minlərlə insan hərbi xərclərin artırılmasına və dövlət sektorunda ixtisarların aparılmasına etiraz edib.
Crossmedia.az xəbər verir ki, bu barədə “Gazeta.ru” məlumat yayıb.
Bildirilib ki, həmkarlar ittifaqlarının təşkil etdiyi kütləvi yürüşdə bir neçə min nəfər iştirak edib. Etirazçılar hərbi xərclərin artırılmasının ölkədəki iqtisadi çətinliklər fonunda məqsədəuyğun olmadığını bildiriblər.
Aksiya iştirakçıları əməkhaqlarının artırılmasını, dövlət sektorunda ixtisarların dayandırılmasını və minimum əməkhaqqının daha ciddi şəkildə yüksəldilməsini tələb ediblər.
Məlumata görə, Fransa hökuməti dekabrın 1-dən minimum əməkhaqqını 1502 avroya çatdırmağı vəd edib. Lakin etirazçılar bu artımı yetərsiz hesab edirlər. Onların fikrincə, yeni məbləğ 2027-ci il yanvarın 1-dən tətbiqi planlaşdırılan minimum əməkhaqqından cəmi 5 avro çoxdur.
Qeyd edək ki, Fransada etirazlar sentyabrın sonunda təhsil sahəsindəki problemlərə görə başlayıb və sonradan ölkənin digər bölgələrinə də yayılıb. Oktyabrın 17-də keçirilən aksiyalarda yarım milyondan çox insan iştirak edib. Etirazçılar yanacağın bahalaşmasına və əhalinin alıcılıq qabiliyyətinin azalmasına da qarşı çıxıblar.
19:21 17.11.2026
Oxunuş sayı: 55