Ulduz futbolçu oyuna girmək istəməyib: Lukaku ilə bağlı sensasiyalı İDDİA
Belçika millisinin və “Fənərbağça”nın hücumçusu Romelu Lukakunun milli komandadan ayrılması ilə bağlı diqqətçəkən iddialar ortaya çıxıb. Futbolçunun İtaliya ilə qarşılaşmada meydana çıxmaqdan imtina etdiyi bildirilib.
Crossmedia.az xəbər verir ki, bu barədə Türkiyənin “Sondakika” nəşri Belçikanın HLN qəzetinə istinadən məlumat yayıb.
Məlumata görə, 33 yaşlı hücumçu Belçika millisindən ayrılmaq qərarını İtaliya ilə matçdan əvvəl verib. O, qarşılaşmadan sonra paltardəyişmə otağında 25 komanda yoldaşının qarşısında milli komanda karyerasını başa vuracağını açıqlayıb. Həmin vaxt baş məşqçi Mark van Bommel və məşqçilər heyətinin otaqda olmadığı, qərardan sonradan xəbər tutduğu iddia edilir.
Lukakunun narazılığının Türkiyə ilə oyun öncəsi başladığı bildirilir. İddialara görə, hücumçu həmin qarşılaşmada start heyətində yer almayacağını öyrəndikdən sonra məyus olub. O, omba nahiyəsindəki ağrıları əsas gətirərək komanda ilə səfərə getməyib.
Bundan başqa, Lukakunun İtaliya ilə matç zamanı meydana daxil olmaq təklifini də qəbul etmədiyi irəli sürülüb. Onun öz əvəzinə Hüqo Kuypersin oyuna buraxılmasını təklif etdiyi bildirilir.
Baş məşqçi Mark van Bommel qarşılaşmadan sonra əvəzetmə ilə bağlı qərarın qarşılıqlı razılaşma əsasında verildiyini desə də, həmin vaxt Lukakunun millidən ayrılmaq qərarından xəbərsiz olduğu iddia olunur.
Qeyd edək ki, Romelu Lukaku Belçika millisinin tarixində ən çox qol vuran futbolçudur. O, milli komandanın heyətində 135 oyunda 94 qol vurub. Futbolçu 16 illik milli karyerasını başa vurduğunu noyabrın 16-da açıqlayıb.
19:27 17.11.2026
Oxunuş sayı: 51