2000 ildir qırılmayan faylar — Türkiyəni nə gözləyir? - Alimlər hərəkətə keçdi
Türkiyə və Suriyada 6 fevral 2023-cü il zəlzələlərində qırılmamış fay xətləri araşdırılır. Mütəxəssislər bəzi fayların 500-2000 ildir qırılmadığını bildirərək onların mümkün zəlzələ riskini öyrənməyə çalışırlar.
Crossmedia.az xəbər verir ki, bu barədə "NTV" məlumat yayıb.
AFAD-ın koordinasiyası ilə 20 nəfərlik mütəxəssis qrupu Suriyadakı fay xətlərində araşdırmalara başlayıb. Komanda Türkiyə ilə Suriya ərazisindən keçən Yesemek, Hacıpaşa, Reyhanlı, Afrin, Sarmada və Armanaz faylarını tədqiq edir.
AFAD-ın Zəlzələ Elmi Şurasının üzvü professor Hasan Sözbilir bildirib ki, təxminən 1000 kilometr uzunluğunda olan Ölü dəniz fay zonası Kahramanmaraşdan başlayaraq Qırmızı dənizə qədər uzanır. Onun sözlərinə görə, bu ərazidəki bəzi faylar əsrlərdir qırılmayıb.
Mütəxəssislər növbəti mərhələdə fay xətlərində 20-30 metr enində və 3-4 metr dərinliyində xəndəklər qazaraq nümunələr götürəcəklər. Əldə edilən məlumatlar əsasında ərazidə baş vermiş qədim zəlzələlərin tarixi və gələcək risklər müəyyənləşdiriləcək.
Sözbilir araşdırmanın əsas məqsədini belə izah edib: “Bu faylar sonuncu dəfə nə vaxt zəlzələ yaradıb, bizim nə qədər vaxtımız var – bütün bunları öyrənmək istəyirik”.
Qeyd edək ki, Türkiyə və Suriya arasındakı bu fayların kompleks şəkildə araşdırılması ilk dəfə həyata keçirilir.
19:55 17.11.2026
Oxunuş sayı: 156