Zelenskinin müraciətindən sonra hərəkətə keçdilər — Rütte açıqladı
NATO Ukraynanın "Starshield" sisteminə çıxışını bərpa etməyə çalışır
Crossmedia.az xəbər verir ki, NATO-nun baş katibi Mark Rütte Ukraynanın ABŞ-yə məxsus "Starshield" peyk rabitəsi sisteminə tam çıxışının bərpası istiqamətində müvafiq tərəflərin çalışdığını bildirib.
O, bu barədə Kiyevə silah tədarükü üzrə təmas qrupunun NATO-nun Brüsseldəki qərargahında keçirilən iclasından əvvəl jurnalistlərə açıqlamasında danışıb.
Rutte bildirib ki, tərəflər Ukraynanın sistemə çıxışını mümkün qədər tez bərpa etmək üçün bütün səyləri göstərirlər. Bununla belə, NATO baş katibi məhdudiyyətlərin nə vaxt aradan qaldırılacağını və onların tətbiqinə görə hansı tərəfin məsuliyyət daşıdığını açıqlamayıb.
Qeyd edək ki, noyabrın 14-də Ukrayna Prezidenti Volodimir Zelenski ölkəsinin hərbçilərinin beş gündür ABŞ şirkətinə məxsus peyk rabitəsi sisteminə çıxışının məhdudlaşdırıldığını bildirmişdi.
Zelenski daha sonra ABŞ və "SpaceX" şirkətinə müraciət edərək mövcud məhdudiyyətlərin aradan qaldırılmasını istəmişdi. O, Rusiyanın zərbələrindən sonra Ukraynanın infrastrukturunda yaranmış kritik vəziyyətin rabitə imkanlarının əhəmiyyətini daha da artırdığını vurğulamışdı.
Ukrayna Prezidenti bu məsələ ilə bağlı xarici işlər, müdafiə nazirliklərinə və Prezident Ofisinə ABŞ və "SpaceX" ilə sıx əməkdaşlıq etmək tapşırığı verdiyini də açıqlamışdı.
Xatırladaq ki, "Starshield" ABŞ-nin "SpaceX" şirkəti tərəfindən hazırlanmış təhlükəsiz peyk rabitəsi sistemidir. Starlink texnologiyasına əsaslanan sistem dövlət və hərbi ehtiyaclar üçün nəzərdə tutulub.
21:34 17.11.2026
Oxunuş sayı: 46