Ukraynaya silah tədarükü genişlənir: İsveçdən 71,3 milyon dollar
İsveç Ukraynaya silah alınması üçün yardım edəcək.
Crossmedia.az xarici KİV-ə istinadən xəbər verir ki, İsveç Ukraynaya əlavə hərbi yardım göstərmək məqsədilə təxminən 71,3 milyon dollar vəsait ayıracaq.
Bildirilib ki, ayrılan vəsait Ukraynanın müdafiəsini dəstəkləyən fondlara və təşəbbüslərə yönəldiləcək. Yardımın əsas prioritet istiqamətləri hava hücumundan müdafiə (HHM) sistemləri və uzaqmənzilli hava hücumundan müdafiə vasitələri olacaq.
Məlumata görə, ümumi məbləğin təxminən 19,8 milyon dolları PURL təşəbbüsü çərçivəsində ayrılacaq. Bu mexanizm ABŞ istehsalı olan hərbi texnikanın müttəfiq və tərəfdaş ölkələrin maliyyələşdirməsi hesabına Ukraynaya çatdırılmasını nəzərdə tutur.
Bu, İsveçin həmin təşəbbüsə altıncı maliyyə töhfəsidir. Yeni ödəniş nəzərə alınmaqla, ölkənin PURL çərçivəsində ümumi maliyyə iştirakı 572 milyon dollara çatacaq.
Bundan başqa, təxminən 17,8 milyon dollar Ukrayna üçün döyüş sursatlarının alınmasını nəzərdə tutan Çexiya təşəbbüsünə yönəldiləcək.
Qeyd edək ki, bundan əvvəl Avropa İttifaqı Şurası Ukrayna Fondu çərçivəsində Kiyevə 8 milyard avro məbləğində yeni tranşın ayrılmasını təsdiqləyib. Vəsaitin ölkənin maliyyə sabitliyinin qorunmasına, iqtisadiyyatın bərpasına və islahatların həyata keçirilməsinə sərf olunacağı bildirilib.
Həmçinin Böyük Britaniya Ukraynaya 1000-dən çox zenit raketi göndərəcəyini vəd edib.
21:30 17.11.2026
Oxunuş sayı: 46