Los-Ancelesdə zibil poliqonunda partlayış: İşçilər xəstəxanaya yerləşdirildi
ABŞ-nin Los-Anceles dairəsində yerləşən zibil poliqonunda qaz partlayışı baş verib. Hadisə nəticəsində bir neçə nəfər xəstəxanaya yerləşdirilib, ətraf ərazilərdə yaşayan sakinlərə xəbərdarlıq edilib.
Crossmedia.az xəbər verir ki, hadisə noyabrın 16-da Kaliforniya ştatının Kastaik bölgəsindəki Chiquita Canyon zibil poliqonunda qeydə alınıb.
Məlumata görə, ərazidə qazın çıxarılması məqsədilə aparılan qazma işləri zamanı yerin təxminən 46 metr dərinliyində toplanmış qaz kütləsinə rast gəlinib. Nəticədə təzyiq altında olan qaz və çürüyən tullantı qalıqları havaya püskürərək nəhəng sütun yaradıb.
Los-Anceles dairəsinin Yanğınsöndürmə Departamentinin məlumatına görə, hadisə zamanı altı nəfər xəsarət alıb. Onlar tibbi müayinə üçün xəstəxanaya aparılıblar.
Partlayışdan sonra əraziyə yanğınsöndürənlər və təhlükəli maddələrlə mübarizə üzrə xüsusi qruplar cəlb olunub. Yaxınlıqda yaşayan sakinlərə qapı və pəncərələri bağlı saxlamaq, hadisə yerindən uzaq durmaq tövsiyə edilib.
Rəsmilər havanın keyfiyyətinin yoxlanıldığını və ilkin ölçmələrdə ətraf əhali üçün təhlükə aşkarlanmadığını bildiriblər. Hadisə nəticəsində yaranan tüstü sütunu isə gecə saatlarında əhəmiyyətli dərəcədə azalıb.
Qeyd edək ki, sözügedən poliqon uzun müddətdir xoşagəlməz qoxular, qaz sızmaları və ətraf mühitə mümkün zərər səbəbindən mübahisə mövzusu idi. Kaliforniya prokurorluğu oktyabr ayında poliqonun operatorlarına qarşı ekoloji pozuntularla bağlı məhkəmə iddiası qaldırıb.
23:45 17.11.2026
Oxunuş sayı: 43