Rusiyada qida fabriklərinin işçilərinə zinət əşyaları qadağası
Rusiyanın İstehlakçı Hüquqlarının Müdafiəsi və İnsan Rifahına Nəzarət üzrə Federal Xidməti (Rospotrebnadzor) qida istehsalı müəssisələrinin əməkdaşlarının xarici görünüşü ilə bağlı yeni tələblər tətbiq etməyi planlaşdırır.
Crossmedia.az xəbər verir ki, bu barədə "RİA Novosti" məlumat yayıb.
Hazırlanan sənəd layihəsinə əsasən, qida istehsalı müəssisələrində çalışan əməkdaşların saçları tamamilə baş geyiminin altında olmalıdır. Məhsula düşərək çirklənməyə səbəb ola biləcək süni kirpiklərdən, strazlardan və digər dekorativ elementlərdən istifadə də qadağan edilə bilər.
Yeni qaydalara əsasən, işçilər dırnaqlarını qısa saxlamalı, lak, süni və ya uzadılmış dırnaqlardan istifadə etməməlidirlər.
Sırğa, üzük və bilərziklər də qadağan olunur
Sənəd layihəsində hazır qida məhsulları ilə birbaşa işləyən əməkdaşlara sırğa, üzük, bilərzik, broş, muncuq və digər zinət əşyaları taxmağın qadağan edilməsi nəzərdə tutulur.
Maraqlı məqamlardan biri isə məhdudiyyətlərin dini əşyalara da şamil edilməsidir.
Bundan başqa, saqqalı olan əməkdaşlar onu xüsusi qoruyucu geyimlə, məsələn, sanitariya maskası ilə tam örtməlidirlər.
Qadağanın səbəbi nədir?
Qurumun yeni tələbləri qida məhsullarının təhlükəsizliyinin təmin edilməsi və istehsal zamanı sanitar normaların pozulmasının qarşısının alınması məqsədi daşıyır.
Bundan əvvəl Moskva vilayətindəki qida fabriklərindən birinin keyfiyyət üzrə direktoru istehsalat müəssisələrində əsas problemlərdən birinin əməkdaşların sanitar qaydalara əməl etməməsi olduğunu bildirmişdi.
Onun sözlərinə görə, işçilərin saçları qoruyucu vasitələrdən düzgün istifadə edilmədikdə hazır məhsullara düşə bilər. Əlcəklərdən yanlış istifadə və şəxsi gigiyenaya kifayət qədər diqqət yetirilməməsi də risk yaradan amillər sırasındadır.
Qeyd edək ki, təklif olunan dəyişikliklər hazırda sənəd layihəsi kimi təqdim olunur. Buna görə də onları qüvvəyə minmiş qadağalar kimi qiymətləndirmək olmaz.
23:08 17.11.2026
Oxunuş sayı: 36