720 mindən çox "BMW" avtomobilində yanğın təhlükəsi aşkarlanıb
ABŞ-də 720 mindən çox "BMW" avtomobilinin sahibinə yanğın təhlükəsi səbəbindən nəqliyyat vasitələrini binalardan və digər avtomobillərdən uzaqda saxlamaq tövsiyə olunub.
Crossmedia.az xəbər verir ki, "Reuters" agentliyi bu barədə məlumat yayıb.
ABŞ Milli Avtomobil Yolları Hərəkətinin Təhlükəsizliyi Administrasiyasının (NHTSA) məlumatına görə, 2012–2018-ci illərdə istehsal edilmiş ümumilikdə 720 796 avtomobil geri çağırılır.
Buna səbəb su nasosunun elektrik birləşdiricisində aşkarlanan nasazlıqdır. Birləşdiriciyə suyun daxil olması qısaqapanmaya və yanğına səbəb ola bilər. Avtomobilin mühərriki söndürüldükdə belə yanğın riski qalır.
Qeyd olunur ki, həmin avtomobillər 2024-cü ildə də oxşar problemə görə geri çağırılıb. Lakin əvvəlki təmirdən sonra da nasazlıqla əlaqəli ola biləcək 10 yanğın hadisəsi qeydə alınıb.
Geri çağırılma "BMW 2 Series", "3 Series", "4 Series", "5 Series", "X1", "X3", "X4", "X5" və "Z4" modellərinin müəyyən versiyalarını əhatə edir.
ABŞ-nin müvafiq qurumu nasazlıq tam aradan qaldırılanadək avtomobillərin açıq havada, binalardan və digər nəqliyyat vasitələrindən uzaqda saxlanılmasını tövsiyə edib.
"BMW" problemin aradan qaldırılması üçün texniki həll üzərində işləyir. Təmir işlərinin avtomobil sahibləri üçün ödənişsiz aparılacağı bildirilir.
15:40 14.11.2026
Oxunuş sayı: 122
