Parisdəki etiraz aksiyalarına minlərlə insan qatılıb
Parisdə minlərlə insan artan qiymətlərə qarşı etirazlara qoşulub.
Crossmedia.az xəbər verir ki, TASS agentliyinin məlumatına görə, Parisdə minlərlə insan artan qiymətlərə və hüquq-mühafizə orqanları əməkdaşlarının əvvəlki etiraz aksiyalarının iştirakçılarına qarşı tətbiq etdiyi zorakılığa etiraz olaraq küçələrə çıxıb.
Respublika meydanından (Place de la Republique) Millət meydanına (Place de la Nation) doğru yürüş edən etirazçılar "Zülmə qarşı birlikdə", "Uşaqlarımızın həyatı onların qazanclarından daha dəyərlidir" kimi şüarlar səsləndiriblər.
Hazırda parlamentdə müzakirə olunan və hüquq-mühafizə orqanları tərəfindən silah tətbiqinin qanuniliyini ehtimal kimi qəbul edən qanun layihəsi etirazların əsas səbəblərindən biridir. "SAVE" təşkilatının sözçüsü İssam Əl-Xəlfauinin sözlərinə görə, əgər bu qanun layihəsi qəbul olunarsa, polis və ya jandarm əməkdaşları tərəfindən törədilə biləcək sui-istifadə hallarını araşdırmaq və sübut etmək xeyli çətinləşəcək.
Etirazçılar arasında çoxlu sayda gənc, eləcə də müxtəlif solçu siyasi partiya və hərəkatların bayraqlarını daşıyan fəallar var idi. Artan qiymətlər və zorakılıqla bağlı narahatlıqlarla yanaşı, tələbə və məktəb birliklərinin nümayəndələri əcnəbi tələbələr üçün nəzərdə tutulan bəzi güzəştlərin ləğv edilməsini, həmçinin universitetlərdə təhsil alanlara verilən təqaüdlərin məbləğinin yetərsiz olmasını pisləyiblər.
22:37 14.11.2026
Oxunuş sayı: 82
