Tramp demokratların araşdırmalarına qarşı sərt tədbirlər hazırlayır
ABŞ Prezidenti Donald Trampın administrasiyası Demokratlar Partiyasının Konqresdə başladacağı genişmiqyaslı araşdırmalara qarşı sərt cavab tədbirləri hazırlayır.
Crossmedia.az xəbər verir ki, bu barədə “The New York Times” nəşri məlumat yayıb.
Məlumata görə, demokratların aralıq seçkilərdə qələbəsindən sonra Ağ Ev onların Trampın fəaliyyəti, ailəsi, administrasiya nümayəndələri və prezidentin əsas maliyyə dəstəkçiləri ilə bağlı araşdırmalarına mane olmağa çalışacaq.
Bununla yanaşı, administrasiya Konqres üzvlərinin bəzi addımlarını mümkün cinayət əməlləri kimi qiymətləndirməyi planlaşdırır.
Strategiyanın əsas koordinatorunun Ağ Evin yeni aparat rəhbəri Stiven Miller olacağı bildirilir. Onunla yanaşı, ABŞ Ədliyyə Nazirliyi və prezident administrasiyasının hüquq xidməti də prosesə cəlb olunub.
Demokratlar artıq Trampın maliyyə dəstəkçilərindən biri, ianə toplama fəaliyyəti ilə məşğul olan Meredit O'Rurkla bağlı araşdırmaya başlayıblar. Senatorlar Elizabet Uorren, konqresmen Robert Qarsiya və senator Riçard Blumental onun Trampın tikinti layihələri üçün 800 milyon dollardan çox vəsaitin cəlb edilməsində rolunu araşdırmaq niyyətindədirlər.
Qanunvericilər hesab edirlər ki, ianə toplama fəaliyyəti mümkün korrupsiya və siyasi xidmətlər müqabilində maliyyə dəstəyi göstərilməsi ilə bağlı ciddi şübhələr yaradır. O'Rurkun nümayəndəsi isə ittihamları rədd edərək Trampın pulla ələ alınmasının mümkün olmadığını bildirib.
Donald Tramp öz növbəsində Ədliyyə Nazirliyinə Demokratlar Partiyasının nümayəndələrinin hərəkətlərini araşdırmaq barədə göstəriş verib.
Bundan əlavə, Texas ştatının Cənub dairəsi üzrə federal prokuroru Aaron Reyts senator Riçard Blumentala xəbərdar edib ki, Ağ Evin bal zalının tikintisinə maliyyə dəstəyi göstərən şəxslərlə bağlı araşdırmanı davam etdirəcəyi təqdirdə ciddi hüquqi nəticələrlə üzləşə bilər.
ABŞ-nin baş prokuroru Todd Blanş isə Konqresin gələcək üzvlərinin bəyanatları ilə əlaqədar hazırda cinayət araşdırmalarının aparılmadığını bildirib. Bununla belə, o, müəyyən hallarda təhdidlərin cinayət məsuliyyətinə səbəb ola biləcəyini istisna etməyib.
Qeyd edək ki, Ağ Ev demokratların Trampın əldə etdiyi nailiyyətləri ləğv edə bilməyəcəyini bəyan edib.
21:39 14.11.2026
Oxunuş sayı: 87
