Bir ildir istifadə olunmayan telefonlar bağlanacaq — Bu ölkədə
Türkiyədə 2026-cı il ərzində mobil şəbəkədən heç bir siqnal almayan milyonlarla mobil telefonun dekabrın 31-də gecə yarısından etibarən istifadəyə bağlanacağı gözlənilir.
Crossmedia.az xəbər verir ki, bu barədə “Sözcü” nəşri məlumat yayıb.
Məlumata görə, Türkiyənin İnformasiya Texnologiyaları və Kommunikasiya Qurumu (BTK) tərəfindən 2024-cü ildən tətbiq edilən qaydalara əsasən, bir təqvim ili ərzində mobil şəbəkədən heç bir siqnal almayan telefonların IMEI nömrələri avtomatik olaraq deaktiv edilir.
Bildirilir ki, 2026-cı il ərzində ümumiyyətlə istifadə edilməyən cihazlar dekabrın 31-dək şəbəkəyə qoşulmadıqları təqdirdə rabitə xidmətlərindən məhrum ola bilərlər.
Qeyd olunur ki, ehtiyat telefonları sadəcə enerji ilə təmin etmək və ya Wi-Fi şəbəkəsinə qoşmaq kifayət etmir. Cihazın aktiv hesab olunması üçün işlək SİM kart taxılmalı və mobil operatorun şəbəkəsindən siqnal qəbul etməsi təmin edilməlidir. Bunun üçün qısa zəng etmək, SMS göndərmək və ya mobil internetdən istifadə etmək lazımdır.
IMEI nömrəsi deaktiv edilən telefonları yenidən istifadəyə qaytarmaq mümkündür. Bunun üçün cihazın son istifadəçisi və ya qanuni sahibi Türkiyənin e-Devlet sistemi vasitəsilə BTK-ya müraciət edərək telefonun ona məxsus olduğunu təsdiqləməlidir.
Lakin qəbzi olmayan və əvvəlki sahibinə çatmaq mümkün olmayan ikinci əl telefonların yenidən qeydiyyata alınması çətinləşə bilər.
23:18 14.11.2026
Oxunuş sayı: 236
