Ərdoğanın ermənidilli televiziya kanalına dəstəyi beynəlxalq sammitdə alqışlanıb
Türkiyə Prezidenti Rəcəb Tayyib Ərdoğanın ölkədə ilk ermənidilli televiziya kanalının yaradılmasına verdiyi dəstək Dünya Erməniləri Sammitində iştirakçıların alqışları ilə qarşılanıb.
Crossmedia.az xəbər verir ki, bu barədə Türkiyənin TRT Haber telekanalı məlumat yayıb.
Məlumata görə, noyabrın 5-8-də Ermənistanın paytaxtı İrəvanda keçirilən Dünya Erməniləri Sammitində Türkiyə Prezident Administrasiyasının Mədəniyyət və İncəsənət Siyasəti Şurasının üzvü, “Luys Media”nın İdarə Heyətinin sədri Kuran çıxış edib.
O, sammitin mədəniyyət panelində Türkiyədə ermənidilli televiziya kanalının yaradılması prosesindən danışıb. Kuran bildirib ki, layihə ilə bağlı əvvəlcə Ərdoğana müraciət edilib və Qərbi erməni dilinin qorunmasının vacibliyi diqqətə çatdırılıb.
Onun sözlərinə görə, Ərdoğan müraciətə “Əlbəttə, yaradın” cavabını verib. Bu açıqlama əvvəlcə türkcə bilən iştirakçılar, daha sonra isə ermənicəyə sinxron tərcümə olunduqdan sonra digər nümayəndələr tərəfindən alqışlarla qarşılanıb.
Kuran bildirib ki, müvafiq rəsmi müraciətlərdən sonra “Luys TV”nin yaradılması üçün icazə cəmi 24 saat ərzində verilib. Kanal türk və Qərbi erməni dillərində yayımlanaraq Türkiyədə və digər ölkələrdə yaşayan ermənilərə çatmağı hədəfləyir.
22:44 14.11.2026
Oxunuş sayı: 246
