Rusiya NATO-dan 1997-ci il mövqelərinə qayıtmağı tələb edir
Rusiya Ukrayna müharibəsinin başa çatdırılması ilə bağlı danışıqlarda NATO-nun hərbi qüvvələrini və bazalarını 1997-ci ildəki mövqelərinə geri çəkməsini tələb edib.
Crossmedia.az xəbər verir ki, "The New York Times" bu barədə məlumat yayıb.
Nəşrin məlumatına görə, Rusiya rəsmiləri bu tələbləri ABŞ nümayəndələri ilə Əbu-Dabidə keçirilən qapalı danışıqlar zamanı təqdim ediblər. Moskvanın mövqeyini əks etdirən sənəd noyabrın 10-da hazırlanıb və danışıqlar iştirakçılarından birinin vasitəsilə qəzetin əldə etdiyi nüsxəyə əsaslanır.
Sənəddə NATO-nun gələcək genişlənməsinin qarşısının alınması, eləcə də alyansın Ukrayna, Şərqi Avropa, Cənubi Qafqaz və Mərkəzi Asiyada hərbi fəaliyyətinin dayandırılması tələb olunur.
Bununla yanaşı, Rusiya Ukraynaya Qərb silahlarının və hərbi texnikasının tədarükünün dayandırılmasını da istəyir.
Nəşr vurğulayıb ki, Moskvanın bu tələbləri 2021-ci ilin dekabrında irəli sürdüyü təklifləri xatırladır. Həmin vaxt Rusiya NATO-nun hərbi qüvvələrinin alyansın 1997-ci ildəki mövqelərinə qaytarılmasını tələb etmişdi.
Qeyd edək ki, qəzetin əldə etdiyi sənəd rəsmi blankda tərtib edilməyib və imzalanmayıb. Onun həqiqiliyi danışıqlardan məlumatlı ikinci şəxs tərəfindən təsdiqlənib.
18:32 14.11.2026
Oxunuş sayı: 112
