Almaniya yeni nəsil qırıcı təyyarə layihəsində kənarda qala bilər
İtaliya Almaniyanın yeni nəsil qırıcı təyyarələrin hazırlanmasını nəzərdə tutan beynəlxalq GCAP proqramına tamhüquqlu üzv kimi qoşulmasına qarşı çıxıb. Roma Berlinə layihədə müşahidəçi statusunun verilməsini təklif edib. Bu status Almaniyaya təyyarənin layihələndirilməsi və hazırlanmasında iştirak hüququ verməyəcək.
Crossmedia.az xəbər verir ki, bu barədə “Financial Times” məlumat yayıb.
Nəşrin məlumatına görə, İtaliyanın müdafiə naziri Gvido Krozetto bu həftə britaniyalı və yaponiyalı həmkarları ilə videokonfrans zamanı Almaniyaya bərabərhüquqlu iştirakçı statusunun verilməsinə etiraz edib. İtaliya tərəfi müşahidəçi statusunun proqramın icrasını sürətləndirəcəyini bildirib.
“İtaliya Almaniyanı qəbul etməyə hazır olduğunu təsdiqləyib, lakin prosesi sürətləndirmək üçün ona müşahidəçi statusunun verilməsi təklif olunub”, – deyə İtaliya hökumətinin nümayəndəsi bildirib.
Bu təklifin Berlin tərəfindən qəbul edilməyəcəyi ehtimal olunur. Almaniya layihənin tamhüquqlu iştirakçısı olmağı, maliyyə töhfəsi verməyi və öz müdafiə sənayesi üçün əhəmiyyətli həcmdə sifarişlər əldə etməyi planlaşdırır. Almaniya rəsmilərindən biri İtaliyanın təklifini qəbuledilməz adlandırıb.
İtaliya və Yaponiya iştirakçı ölkələrin sayının artırılmasının mürəkkəb texnoloji layihənin idarə edilməsini çətinləşdirəcəyindən və gecikmələrə səbəb olacağından ehtiyat edirlər. Bundan əlavə, “Airbus” da daxil olmaqla, Almaniya şirkətlərinin layihəyə qoşulması iki ölkənin müdafiə sənayesi müəssisələri üçün sifarişlərin həcmini azalda bilər.
Böyük Britaniya daha əvvəl Almaniyanın proqrama qoşulması məsələsinə baxmağa hazır olduğunu bildirib. Bununla belə, London layihənin icra müddətinə mənfi təsir göstərə biləcək addımları dəstəkləmədiyini vurğulayıb. Üç ölkə məsələni hazırkı iştirakçı tərkibində müzakirə etməyə davam etmək barədə razılığa gəlib.
Berlin GCAP proqramını Fransa və Almaniyanın birgə həyata keçirdiyi FCAS layihəsinə alternativlərdən biri kimi nəzərdən keçirir. Airbus və Fransanın “Dassault Aviation” şirkəti arasında uzun illər davam edən fikir ayrılıqları səbəbindən FCAS proqramının icrası iyunda faktiki olaraq dayandırılıb.
Almaniya İspaniya və İsveçin “Saab” şirkəti ilə əməkdaşlıq imkanlarını da araşdırır. Lakin İsveçdəki siyasi qeyri-müəyyənliyin danışıqları ləngidə biləcəyi bildirilir.
Almaniyanın müdafiə naziri Boris Pistorius ölkəsinin qərarının GCAP-da iştirakın nə dərəcədə sərfəli olacağından asılı olduğunu deyib. Berlin layihədə iş bölgüsünü, icra müddətini və maliyyə xərclərini qiymətləndirməyi planlaşdırır. Pistorius Almaniyanın gələcək strategiyasını 2027-ci ilin mart ayının sonunadək müəyyənləşdirməyi nəzərdə tutur.
Qeyd edək ki, Böyük Britaniya, İtaliya və Yaponiyanın birgə həyata keçirdiyi GCAP proqramı 2035-ci ilə yaxın yeni nəsil qırıcı təyyarənin istifadəyə verilməsini nəzərdə tutur. Layihənin əsas məqsədlərindən biri iştirakçı ölkələrin hərbi imkanlarını gücləndirmək və onların ABŞ istehsalı olan döyüş təyyarələrindən asılılığını azaltmaqdır.
20:18 14.11.2026
Oxunuş sayı: 110
