Moskvada qapalı iclas: Zelenskinin öldürülməsi müzakirə olunur
Rusiya Təhlükəsizlik Şurasının qapalı iclasında Ukrayna Prezidenti Volodimir Zelenskinin və Ukrayna Silahlı Qüvvələrinin Baş Qərargah rəhbərliyinin fiziki məhvinə dair qeyri-rəsmi qadağanın aradan qaldırılması ilə bağlı qərar qəbul edildiyi iddia olunur.
Crossmedia.az xəbər verir ki, bu barədə “MK” nəşri məlumat yayıb.
Rusiya mənbələrinin iddiasına görə, qapalı müşavirə zamanı güc strukturlarının nümayəndələri Ukrayna rəhbərliyinə toxunmamaqla bağlı əvvəlki razılaşmalardan imtina etməyi tələb ediblər.
Buna səbəb kimi Leninqrad vilayətinə, xüsusilə Ust-Luqa limanına davam edən pilotsuz uçuş aparatları hücumları göstərilib.
İclas iştirakçılarının müdafiə strategiyasını səmərəsiz hesab etdikləri bildirilir. İddialara görə, Rusiyanın güc strukturları Ukraynanın körpülərinə və enerji infrastrukturuna cavab zərbələrinin də hücumların qarşısını almadığını düşünürlər.
Bu səbəbdən onların Ukrayna rəhbərliyinin əmrlərini verən şəxslərin hədəfə alınmasını təklif etdikləri bildirilir. Rusiya mənbələri xüsusi xidmət orqanları və hərbi aviasiyanın Ukrayna rəhbərliyinin sığınacaqlarına və avtomobil karvanlarına qarşı ağır hipersəs silahlarından istifadə icazəsi ala biləcəyini iddia edirlər.
Məlumata görə, dərin yeraltı sığınacaqların dağıdılması üçün FAB-3000 tipli üçtonluq aviabombalardan və “İsgəndər” ballistik raketlərindən istifadə edilməsi də təklif olunub.
Qeyd edək ki, Rusiya daha əvvəl Əbu-Dabidə keçirilən üçtərəfli danışıqlarda nümayəndə heyətinə Federal Təhlükəsizlik Xidmətinin (FTX) əks-kəşfiyyat əməliyyatları departamentinin rəhbəri Dmitri Minayevi də daxil edib. Bu struktur 2019-cu ildə Ukrayna Baş Kəşfiyyat İdarəsinin rəhbəri Kirill Budanova qarşı sui-qəsd cəhdi ilə əlaqələndirilmişdi.
21:43 14.11.2026
Oxunuş sayı: 301
