BMT-dən ABŞ və İrana təcili çağırış: 45 milyon insan...
Birləşmiş Millətlər Təşkilatı (BMT) ABŞ və İranı Hörmüz boğazından gübrə daşımalarının dərhal bərpasına icazə verməyə çağırıb.
Crossmedia.az xəbər verir ki, BMT-nin Layihə Xidmətləri üzrə İdarəsinin (UNOPS) rəhbəri Xorxe Moreyra da Silva bu barədə noyabrın 14-də Türkiyənin Antalya şəhərində keçirilən COP31 iqlim konfransında danışıb.
O bildirib ki, gübrə tədarükünün dayanması xüsusilə həssas ölkələrdə milyonlarla insanı aclıq və yoxsulluq təhlükəsi ilə üz-üzə qoyur.
Moreyra da Silvanın sözlərinə görə, tərəflər münaqişənin həlli üçün hərtərəfli razılaşma üzrə danışıqları davam etdirməli, eyni zamanda gübrə daşımalarının bərpası üçün təcili müvəqqəti tədbirlər görməlidirlər.
“Əslində, bizə gündə beş gübrə daşıyan gəmi lazımdır”, – deyə o bildirib. BMT rəsmisi qərarın təxirəsalınmaz, müddət və əhatə dairəsi baxımından isə məhdud olmasının vacibliyini vurğulayıb.
Qeyd edək ki, fevralın sonunda ABŞ və İsrailin İrana birgə hücumundan sonra Tehran strateji əhəmiyyətli Hörmüz boğazını bağlayıb. Bu, regionda və onun hüdudlarından kənarda gəmiçilik fəaliyyətində ciddi fasilələrə səbəb olub. ABŞ-ın İran limanlarına tətbiq etdiyi blokada isə vəziyyəti daha da ağırlaşdırıb.
BMT nümayəndəsinin məlumatına görə, münaqişədən əvvəl dünya üzrə gübrə tədarükünün üçdə biri Hörmüz boğazından həyata keçirilirdi. Blokadaların tətbiqindən sonra gübrələrin qiyməti 30 faiz artıb.
Böhran xüsusilə Sudan, Somali, Mozambik, Keniya, Nepal, Banqladeş və Şri-Lanka kimi ölkələrə ciddi təsir göstərir. Bildirilib ki, Sudanda son altı ay ərzində ərzaq məhsullarının qiyməti iki dəfə artıb, Nepalda isə fermerlər gübrə almaq imkanlarını itiriblər.
UNOPS rəhbərinin xəbərdarlığına görə, gübrə çatışmazlığı dünyanın müxtəlif bölgələrində əkin mövsümlərinin buraxılmasına səbəb olarsa, 45 milyon insan kəskin ərzaq çatışmazlığı ilə üzləşə bilər. Daha 30 milyon insan isə yoxsulluq həddindən aşağı düşmək riski altındadır.
Moreyra da Silva qeyd edib ki, BMT gübrə daşımalarının bərpası üçün artıq müvafiq mexanizm hazırlayıb. Lazımi razılaşmalar əldə olunarsa, tədarükü 7-10 gün ərzində yenidən təşkil etmək mümkün olacaq
21:18 14.11.2026
Oxunuş sayı: 106
