Moskvanın yeni planı: Avropanın təhlükəsizlik sistemi dəyişə bilər
Rusiya Prezidenti Vladimir Putin Qərbə qarşı yeni tələblər irəli sürməyə hazırlaşır. Moskvanın əsas məqsədi Avropada təhlükəsizlik sistemini Rusiyanın maraqlarına uyğun şəkildə dəyişdirməkdir.
Crossmedia.az xəbər verir ki, bu barədə BBC-nin Rusiya üzrə redaktoru Stiv Rozenberq sülh danışıqları ətrafında yaranmış vəziyyəti təhlil edərkən bildirib.
Onun sözlərinə görə, Kreml ABŞ nümayəndələri Stiv Uitkoff və Cared Kuşnerlə danışıqlardan sonra sülh üçün əsas şərt kimi “bölünməz təhlükəsizlik və sülhün yeni uzunmüddətli arxitekturası”nı irəli sürüb.
Rozenberq hesab edir ki, Moskva bununla Avropanın təhlükəsizlik sistemini öz maraqlarına uyğunlaşdırmağa çalışır. Bu planın reallaşması Soyuq müharibənin başa çatmasından sonra Avropanın təhlükəsizlik sistemində ən böyük dəyişikliklərdən birinə səbəb ola bilər.
Jurnalist xatırladıb ki, Rusiya 2021-ci ilin dekabrında ABŞ və NATO-ya təqdim etdiyi təklifləri yenidən gündəmə gətirib. Həmin tələblər NATO-nun şərqə doğru genişlənməsinin dayandırılmasını, Ukrayna və Gürcüstanın alyansa üzvlüyünə zəmanət verilməməsini, eləcə də NATO-nun Mərkəzi və Şərqi Avropadakı hərbi infrastrukturunun geri çəkilməsini nəzərdə tuturdu.
Rozenberqin sözlərinə görə, Qərb liderləri həmin vaxt bu tələbləri qəbuledilməz ultimatum kimi rədd etmişdilər. İki ay sonra isə Rusiya Ukraynaya qarşı genişmiqyaslı müharibəyə başlayıb.
Məqalədə qeyd olunur ki, Putinin xarici siyasət məsələləri üzrə köməkçisi Yuri Uşakov Moskvanın Qərbin Rusiyaya strateji məğlubiyyət yaşatmaq cəhdlərini nəzərə alaraq tələblər siyahısına yeni müddəalar əlavə edə biləcəyinə işarə edib.
BBC jurnalisti Avropanın danışıqlarda iştirak etməməsini də əsas problemlərdən biri kimi göstərib. Onun sözlərinə görə, Moskva Avropa nümayəndələrinə danışıqlar masasında yer verməyə həvəsli görünmür. Halbuki Ukrayna, Rusiya və ABŞ arasında Əbu-Dabidə keçirilən danışıqlarda Avropanın növbəti mərhələdə iştirakı məsələsi gündəmə gəlib.
Rozenberq hesab edir ki, Putin ABŞ-nin razılaşma əldə etmək üçün təşəbbüslər göstərməsindən və Avropa ölkələrinin Moskva ilə təmas imkanlarını nəzərdən keçirməsindən istifadə edərək danışıqlarda güzəştsiz mövqe nümayiş etdirir.
Bununla yanaşı, jurnalist Rusiyanın müharibə ərzində ciddi hərbi itkilər verdiyini və iqtisadiyyatının artan təzyiqlə üzləşdiyini qeyd edib. Ukraynanın Rusiya neft emalı zavodlarına pilotsuz uçuş aparatları ilə hücumları ölkədə yeni yanacaq qıtlığı ilə bağlı narahatlıqları artırır.
Bütün bunlara baxmayaraq, Rozenberqin qənaətinə görə, mövcud vəziyyət hələlik Kremli hərbi əməliyyatları dayandırmağa vadar etməyib.
21:31 14.11.2026
Oxunuş sayı: 105
