Diaspor

İsveçdə Zəfər Gününə həsr olunan şahmat turniri keçirilib

İsveçin Yöteborq şəhərində Azərbaycanın şanlı Zəfərinin 6-cı ildönümünə həsr olunan şahmat turniri keçirilib.

Crossmedia.az xəbər verir ki, turnir Azərbaycan Respublikasının Diasporla İş üzrə Dövlət Komitəsinin dəstəyi, Skandinaviya Azərbaycanlıları Koordinasiya Şurasının və Azərbaycan Qarabağ Mərkəzinin təşkilatçılığı ilə baş tutub.

Yarışda Yöteborq və ətraf bölgələrdə yaşayan uşaqlar və gənclər iştirak ediblər. Ümumilikdə 16 iştirakçının qatıldığı turnir gənc nəslin intellektual inkişafında, şahmata marağının artırılmasında və şanlı Zəfər tariximizin gənclər arasında təbliğində mühüm rol oynayıb.

Əvvəlcə Azərbaycan Respublikasının Dövlət Himni səsləndirilib, Vətənimizin azadlığı və ərazi bütövlüyü uğrunda canlarından keçmiş şəhidlərimizin əziz xatirəsi bir dəqiqəlik sükutla yad edilib.

İsveç Azərbaycanlıları Koordinasiya Şurasının Yöteborq üzrə koordinatoru, Azərbaycan Qarabağ Mərkəzinin rəhbəri Ülviyyə Nəcəfova Zəfər Gününün Azərbaycan xalqının tarixindəki mühüm yerindən və Müzəffər Ali Baş Komandan İlham Əliyevin rəhbərliyi ilə rəşadətli Azərbaycan ordusunun qazandığı bu böyük qələbənin gələcək nəsillərə çatdırılmasının vacibliyindən danışıb.

Şahmat müəllimi, turnirin təşkili və keçirilməsinə dəstək göstərən Pərviz Abbaszadə yarışın qaydaları və formatı barədə iştirakçılara məlumat verib.

Maraqlı və gərgin mübarizə şəraitində keçən turnirin nəticələrinə əsasən, Mikayıl Kərimli birinci, Nuray Abbaszadə ikinci, Oğuzxan Hüseyn üçüncü, Fatma Hüseyn isə dördüncü yeri tutub.

Yarışın sonunda qaliblər təbrik olunub, bütün iştirakçıların fəallığı və idman əzmi yüksək qiymətləndirilib.

Qeyd edək ki, belə təşəbbüslər soydaşlarımız arasında milli-mənəvi dəyərlərin qorunması, Vətən tarixinin təbliği, həmrəyliyin gücləndirilməsi və gənc nəslin intellektual inkişafı baxımından mühüm əhəmiyyət daşıyır.

🖨 Çap et

12:02 06.11.2026

Oxunuş sayı: 27