Dunayın rekord səviyyədə dayazlaşması Ukrayna taxılının ixracına zərbə vurub
Dunay çayında suyun səviyyəsinin rekord dərəcədə aşağı düşməsi Ukraynadan taxıl ixracına mənfi təsir göstərib.
Crossmedia.az “Bloomberg”ə istinadən xəbər verir ki, isti hava və yağıntıların azlığı səbəbindən Dunayda suyun səviyyəsi rekord minimuma enib.
Nəticədə barjlar daha az yük götürməyə məcbur olur, daşınma xərcləri artır və taxılın Rumıniyanın Konstansa limanına çatdırılma müddəti uzanır.
Problemin Ukraynanın liman infrastrukturuna Rusiyanın zərbələrinin intensivləşdiyi bir vaxtda yaranması vəziyyəti daha da çətinləşdirib. Hücumlar səbəbindən Ukrayna taxıl ixracının bir hissəsini Qara dəniz marşrutlarından Dunay çayına, dəmir yollarına və avtomobil nəqliyyatına yönəltməli olur.
Bununla belə, alternativ marşrutların ümumi gücü Ukraynanın Qara dəniz limanlarının ötürmə qabiliyyətinin yalnız üçdə birini təmin edə bilir.
Məlumata görə, bu vəziyyət qlobal taxıl bazarı üçün əlavə risklər yaradır. Rusiya və Ukrayna birlikdə dünya üzrə buğda ixracının dörddə birindən çoxunu təmin edir.
Analitiklərin fikrincə, döyüşlərin intensivliyi azalmasa və Dunayda suyun səviyyəsi bərpa olunmasa, taxıl qiymətlərinin yüksək səviyyədə qalması mümkündür.
21:06 10.08.2026
Oxunuş sayı: 38
