Trampın Əliyev və Paşinyana zəngi Ermənistanda suallar yaratdı: ABŞ artıq balansı qorumur?
Erməni politoloq Akop Badalyan ABŞ Prezidenti Donald Trampın avqustun 8-də Azərbaycan Prezidenti İlham Əliyev və Ermənistanın Baş naziri Nikol Paşinyanla telefon danışığını şərh edib.
Crossmedia.az bu barədə “Aysor”a istinadən mıəlumat yayıb.
Badalyan bildirib ki, telefon danışıqları ilə bağlı Azərbaycan və Ermənistan tərəfindən yayılan məlumatlar arasında diqqətçəkən fərq var.
“Azərbaycanın yaydığı məlumatda qeyd olunur ki, Əliyev Trampa ABŞ-da keçiriləcək “Böyük iyirmilik” (G20) sammitində iştirak etmək üçün dəvətə görə təşəkkür edib. Ermənistanın Paşinyanla telefon danışığı barədə yaydığı məlumatda isə belə bir qeyd yoxdur”, – deyə politoloq yazıb.
O, bunun Trampın yalnız Əliyevi G20 sammitinə dəvət etdiyi, Paşinyana isə dəvət göndərmədiyi anlamına gəlib-gəlmədiyini sual edib.
Badalyanın sözlərinə görə, G20 sammiti 2026-cı il dekabrın 14-15-də ABŞ-ın Florida ştatının Mayami şəhərində keçiriləcək.
Politoloq hesab edir ki, əgər Azərbaycan Prezidenti dəvət alıb, Ermənistanın Baş naziri isə almayıbsa, bu, ABŞ-nin egiondakı real yanaşmasının göstəricisi ola bilər.
“Bu, xüsusilə onu göstərə bilər ki, Ermənistan bütün bu prosesdə ABŞ-ın Azərbaycanla müəyyən razılaşmalara nail olması üçün sadəcə vasitədir. Mən bunu dəfələrlə demişəm”, – deyə Badalyan bildirib.
O qeyd edib ki, Paşinyanın da sammitə dəvət alması vəziyyətin tamamilə fərqli məntiqə malik olacağı anlamına gəlmir.
“Sadəcə bu halda biri dəvət alır, digəri isə yoxdursa, mahiyyət etibarilə belə görünür ki, ABŞ artıq heç olmasa balans görüntüsünü qorumağa belə çalışmır”, – deyə erməni politoloq vurğulayıb.
Badalyan bununla yanaşı, ABŞ-nin balansı qorumaq üçün Trampın Paşinyana da telefon açmasını kifayət hesab edə biləcəyini istisna etməyib.
Qeyd edək ki, avqustun səkkizində Tramp Prezident İlham Əliyev və Paşinyanla danışıb.
16:07 09.08.2026
Oxunuş sayı: 79
