Xarici xəbərlər

İsrail Qəzzanın cənubunda bərpa işlərinə gizli şəkildə icazə verib

İsrail Baş naziri Benyamin Netanyahu və müdafiə naziri İsrael Katz Qəzza zolağının cənubunda, HƏMAS-ın nəzarətində olmayan ərazilərdə bərpa işlərinin başlanmasına icazə veriblər.

Crossmedia.az xəbər verir ki, İsrailin “Ordu radiosu” bu barədə məlumat yayıb.

Məlumata görə, işlər İsrail Müdafiə Ordusunun (ÇAXAL) nəzarətində olan Şərqi Rəfah bölgəsində, HƏMAS-la atəşkəs xəttini göstərən “sarı xətt”in yaxınlığında aparılır.

İşlər gələcək yaşayış fondunun yaradılması üçün infrastrukturun qurulmasını nəzərdə tutur. “Ordu radiosu”nun məlumatına görə, Netanyahu və Katz bu işlərə təxminən iki həftə əvvəl, qərarı ictimaiyyətə açıqlamadan razılıq veriblər.

Qərarın Qəzzanın müəyyən hissələrinə nəzarəti öz üzərinə götürməsi nəzərdə tutulan Beynəlxalq Sabitləşdirmə Qüvvələrinin yerləşdirilməsinə hazırlıq fonunda qəbul edildiyi bildirilir.

İşlərin təhlükəsizlik yoxlamasından keçdikdən sonra Qəzzadan olan fələstinli podratçılar və işçilər tərəfindən həyata keçiriləcəyi qeyd olunur.

Netanyahunun ofisi işlərin başladığını təsdiqləyib. Bununla belə, ofisdən bildirilib ki, layihə artıq bir neçə aydır BƏƏ-nin dəstəklədiyi müvəqqəti yaşayış məntəqələrinin yaradılması proqramı çərçivəsində həyata keçirilir. Bu yaşayış məntəqələrinin HƏMAS-ın nəzarətindən kənarda olması nəzərdə tutulur.

Baş nazirin ofisinin açıqlamasında qeyd edilib ki, hazırda ərazi terror infrastrukturu və tunellərdən təmizlənib.

Eyni zamanda, elektrik enerjisi, kanalizasiya və su təchizatı ilə bağlı işlərin Qəzza sakinləri tərəfindən aparılmayacağı və bu fəaliyyətlərin ÇAXAL-ın nəzarətində olacağı bildirilib.

Netanyahu yanvarda Qəzzanın bərpasına yalnız HƏMAS silahlarını təhvil verdikdən sonra icazə veriləcəyini açıqlamışdı. O, həmin vaxt Qəzzanın demilitarizasiyasından əvvəl bərpa işlərinə başlanılacağı ilə bağlı iddiaları rədd etmişdi.

İsrailin nəqliyyat naziri Miri Regev isə bərpa işlərinin HƏMAS-ın nəzarətində olmayan Qəzzanın istənilən hissəsində aparıla biləcəyini bildirib.

“Biz Qəzzanın bərpa olunmasını istəyirik”, – Regev “Ordu radiosu”na açıqlamasında deyib.

🖨 Çap et

14:02 09.08.2026

Oxunuş sayı: 50